Willemstad- Curaçao Beverage Bottling Co.B.V. (CBBC), mihó konosí komo “Coca-Cola Kòrsou”, ta sigui inbèrtí den nos isla. E inbershonnan aki ta dirigí speshal riba mehoramentu di su prosesonan di kalidat, su klientenan i su personal. Tambe tabatin varios inovashon den fabrika. Pa tal motibu a yega momentu pa hasi un rekonstrukshon intenso na fasilidatnan di e Departamentu di Servisio Tékniko.

E Departamentu Tékniko di CBBC ta enkargá ku entrega di mashinnan di Post-Mix i kuler na Kòrsou i Boneiru na klientenan ku ta bini na remarke pa esaki. Tambe e departamentu ta responsabel pa mantenshon di e materialnan aki. Parti importante di e trabounan ta konsistí di kontròl di kalidat kontinuo di e aparatonan di Post-Mix instalá, di manera ku e kalidat mas haltu di refresko ta keda garantisá. Komo úniko departamentu denter di CBBC e departamentu di tékniko tin servisio di 24 ora i ta bou di maneho profeshonal di Sr. Jersley Martis, ku ya tin kasi 25 aña den servisio di CBBC.

CBBC ta propietario orguyoso di hopi sertifikashon, entre nan e ISO 14001:2015 i OHSAS 18001: 2005. Ku regularidat hinter e empresa ta haña diferente ‘’Audits”. E Direktor Asistente di Maneho di CBBC, Sr. Andrew Pinedo durante di e apertura ku palabra elokuente a papia di empleadonan di tal departamentu ku durante di diferente  ‘‘audit’’  a logra  skorenan haltu. Tambe ela komplimentá e departamentu aki pa nan dedikashon pa duna klientenan di Coca-Cola e mihó servisio posibel.