WILLEMSTAD – Djamars dia 2 di yüli,  selebrashon di Dia di Bandera na Renaissance Mall & Rif Fort lo ta un biaha mas kargá ku ambiente.  Lo selebrá ku músika di Típiko Pasa Bon entre 12’or i 3’or di mèrdia, siguí pa músika di RuBeBa di 3’or pa 6’or di atardi i lo tin un baile folklóriko entre 1’or ku 2’or di mèrdia na e fòntein. E tan gusta bazar rondó di e fòntein e aña aki lo keda engrandesé ku un marshe den e galeria dilanti di UTS, Mom & Co i Little Switzerland. Parti atardi, entre 6’or i 9’or di anochi lo tin ambiente di K’Ribe riba esenario na Rif Fort.

Manera semper pa Dia di Bandera Renaissance Mall & Rif Fort a prepará stènt ku kuminda netamente ‘krioyo’ i kos di boka dushi pa tantu bishitantenan lokal i turistanan por disfrutá. Lo tin entretenimentu pa mucha, ‘face painting’ i diferente otro wega. Pa tur amante di e popular outonan wabi, lo tin un eksposishon di Wabi spesialmente pa e dia aki. Miéntras huéspetnan di e resort ta sera konosí ku nos ambiente i gastronomia lokal, nos komo pueblo por disfrutá di un dushi kushina krioyo i selebrá nos Dia di Bandera. Yega trempan! Tur establesimentu lo tin promoshon i deskuentonan spesial.

Tur esnan ku ta deseá un stènt riba e dia aki por yama 435.5022 òf email marketing@curacaorenaissance.com pa registrashon i informashon. Riba e dia aki tambe tur hende por parker grátis. Renaissance Mall & Rif Fort ta invitabo pa sali kas i selebrá Dia di Bandera djamars 2 di yüli benidero for di 12’or di mèrdia.