Earth Wind & Fire

Ken no ta kòrda e fiesta ku Earth Wind and Fire a pone na stage Sam Cooke na 2011. Awèl nos tin bon notisia pa bosnan: despues di 8 aña e banda ta bolbe Kòrsou ku su eksitonan inolvidabel di añanan 70 manera Fantasy, September, Boogie Wonderland, After The Love Has Gone i hopi mas. E piesanan aki ta fresku den memoria di esnan ku un tempu ta kana ku karson bèlbòtem i sapatu Godfather. Pa kasi 50 aña e banda di Chicago ta pone fiesta riba esenarionan rònt mundu ku un elenko musikal di dies hende, un sekshon di bras sin presedente i un kombinashon di bos fantástiko; mesklando nan estilo di pòp, disko, soul i funk. Nan fundador Maurice White a fayesé na 2016, pero tres otro miembro prinsipal, e kantante Philip Bailey, e perkushonista Ralph Johnson i e bahista Verdine White (ruman di Maurice) tei ketu bai ku e banda alimentando e kandela ku entusiasmo.

Black Eyed Peas

Na 1995 a funda e banda Black Eyed Peas komo grupo alternativa, pero ku a bira un banda eksitoso, ora ku nan a kambia nan estilo den un banda ku sonido mas bailabel/pòp i e kantante Fergie a djòin e rappernan will.i.am, Taboo y Apl.de.ap,. Nan eksito a bira mas grandi ku nan eksito Where Is The Love? For di nan disko di 2003 Elephunk, ku ta nan di 3 album. Nan siguiente dos diskonan di 2005, Monkey Business i esun di  2009 The E.N.D., ta tin eksitonan ainda mas grandi i e banda a haña un popularidat internashonal ku hitnan entre otro manera: Shut Up, Don’t Phunk With My Heart, My Humps, Boom Boom Pow, i I Gotta Feeling. Ultimamente kosnan ta manera slow rondo di e banda, pa motibu ku algun miembro a bai riba solo tour i will.i.am trahando komo coach den The Voice UK. Despues ku e kantante Fergie a bandoná e banda, awor e banda ta konsistí di tres miembro original i un kantante nobo (Jessica Reynoso). Aña pasá nan a saka un disko nobo titulá Masters Of The Sun Vol. 1.

Nicky Jam

Nick Rivera Caminero ta un artista regetonero, mihó konosí komo Nicky Jam, nòmber ku el a haña den forma  di wega, di un persona ku no ta tin dak riba su kabes tempu e tabata mucha. El a nanse na Boston di un mama Dominikano i tata Puerto Rikeño, e la bai Puerto Rico na edat di dies aña. Despues ku un ehekutivo di un diskero a nota su talento, el a dun’é un kòntrakt i aki su promé disko…Distinto A Los Demás, a sali na edat di 14 aña. El a produsí 5 disko mas te 2007. Su di 6 disko Fénix, a tres’é mas eksito ainda. E disko tin hit manera El Perdón (huntu ku Enrique Iglesias), Hasta El Amanecer, i El Amante. Nicky Jam a kanta e piesa Live It Up huntu ku Will Smith i Era Istrefi na Mundial di Futbòl na Moskou 2017 i a saka Date La Vueltra, ku Luis Fonsi i Sebastián Yatra e aña akí. El a gana diferente premio: Billboard Latin Music Awards, Latin American Music Awards i Latin Grammy Awards i e tin e rekòrt di e kantante ku mas a graba ku otro artista.