Awor e delisi hulandes ta rumbo pa Kòrsou pa e Haring party di Lions Club.

Willemstad – E promé barí di Hollandse Nieuwe awe dia 11 di yüni na Scheveningen Hulanda a generá kasi 100 mil euro; un montante rekòrt.  Curaçao pronto por disfrutá di e úniko Hollandse Nieuwe paso Royal Schmidt Seafood Rotterdam B.V. i Delinova na Kòrsou ta enkargá pa respektivamente transportá, risibí i distribuí e delisia hulandes aki na Kòrsou.

Otro siman e haring lo ta na Kòrsou i Curaçao Lions Club ta organisá Haring & More ku ta tuma lugá djaweps dia 20 di yüni na Ginger Restaurant na Pietermaai. E konosido Haring Party aki di Curaçao Lions Club ta keda organisá pa generá fondo pa Fundashon Duna Mucha un Man.

Karchi ta optenibel na Mensing’s Caminada, v.d. Tweel Supermarket Zeelandia i miembronan di Lions Club. Pa NAf 125,- di 7 pm pa 9 pm bo por disfrutá ilimitá di haring i un open bar. Pa esnan ku no ta kome haring por disfrutá tambe ilimitá di erwetensoep, keshi, bitterballen, HEMA –rookworst i e aña aki tambe di kibbeling. Ku kompra di bo karchi tambe bo tin chèns di gana un armband di oro ku diamante na balor di NAf 4500,- .

Buska bo karchi lihé i disfrutá di e ÚNIKO Hollandse Nieuwe!