Willemstad – Den añanan 80, definitivamente Naick’s Place (kaminda aworaki ta Club SUGAR), tabata un dje nait klupnan mas popular na Kòrsou. Den e tempu di gloria ei, Naick’s Place tabata drai praktikamente tur anochi den siman. Hopi ta esnan ku a keda ku rekuerdonan masha dushi di temporada di Naick’s Place.

Djasabra dia 29 di yüni ta bai rebibá pa ún anochi mas, e dushi periodo di Naick’s Place, durante un tremendo fiesta titulá… ‘BACK 2 NAICK’S PLACE’. Riba e anochi aki diferente DJ outentiko ku a yega di toka den Naick’s Place lo hasi un presentashon chikí. DJ Johnny Mercera lo tei for di Ulanda, DJ Artie Liqui-Lung, DJ Roy Medina i tambe DJ Jean Westmaas. Huntu ku nan lo tin tambe animashon di HAPPY PEANUTS, DJ Boogieman i DJ Guido Tecla pa kaba di kompletá e ambiente orginal di añanan 80. Durante e anochi spesial aki lo duna un homenahe póstumo na Nico Huijskes (q.e.p.d.) ku tabata e figura prinsipal den e éksito di Naick’s.

Ya tin bastante intres riba retnan sosial pa e tremendo fiesta aki i e promé 200 karchinan na e preis spesial di 25 florin ya ta baiendo hopi duru i tur kos ta mustra ku nan lo kaba sigur den e promé simannan di yüni. Entrada general lo ta 35 florin i si sobra na porta entrada lo bira 45. Por yama tambe 560 33 05 pa entrega di karchi (minimo 2). Pues buska bo karchi tempran i prepará pa un dushi anochi di rekuerdo djasabra 29 di yüni, ora ku pa ún anochi so nos bai ‘BACK 2 NAICK’S PLACE’ den e aktual Club Sugar den Saliña.