WILLEMSTAD- 6 di mei 2019 – Alemania ta keda un merkado importante pa Kòrsou, pa e motibu aki Ofisina di Turismo di Kòrsou (CTB) kontinuamente ta organisá seshonnan pa aktualisá agentenan di biahe riba Kòrsou su produkto turístiko. Den kuadro di e esfuersonan aki resientemente CTB a organisá pa 80 agente di biahe aleman un roadshow na 3 siudat na Alemania esta Berlin, Speyer i Munich. Durante 3 dia largu agentenan di biahe a tende di Kòrsou su último novedatnan, entre otro e buelonan di Condor den e temporada di wenter benidero, 2019/20.

Tur e seshonnan a tuma lugá na un lokashon di Sea Life kual ta un di e akuarionan mas grandi na mundu. E motibu pa kual a skohe un esfera akuátiko pa e seshonnan tabata pa laga e agentenan di biahe di forma simbóliko sambuyá den e awanan blou di Karibe na kua  Kòrsou tambe ta forma parti. Ademas di e informashon proveé pa CTB tambe e agentenan di biahe a sigui un presentashon di parti di representantenan di KLM i tambe AERTiCKET kual ta e mayorista independiente den benta di tiket di mas grandi na Alemania. CTB por wak bèk riba otro eksitoso roadshow na Alemania.