Sonny Real, Tico Libiee, Luwi Jano i Paul Welvaart huntu riba tarima.

Den añanan 80 e ritmo di KADANS i ZOUK tabata realmente grandi den farándula. Kòrsou a konosé diferente banda di KADANS i ZOUK ku tabata sumamente popular. Bandanan manera MAIS, TURBO, RIZAM tabata yena fiestanan di KADANS i ZOUK ku miles di fanatiko. Radionan tabata toka kadans i zouk konstantemente. E ritmonan tabata dje popular ei, ku e tabatin hasta su propio estilo di baile. Asina Kòrsou a konosé tambe varios kòntèst di baile di KADANS i ZOUK den añanan 80.

Dia 18 di mei awor, Stichting Save Our Youth Curaçao ta presentá inisio dje projekto : CURAÇAO KADANS & ZOUK REVIVAL. E idea ta pa medio di un projekto riba tèrmino largu, rebibá e ambiente dushi di KADANS & ZOUK na Kòrsou den aña 80. E promé aktividat ta djasabra 18 di mei den W.T.C. ora ku e bandanan MAIS, TURBO, RIZAM i E.R.A. lo topa otro den e ambiente di KADANS i ZOUK, kombiná ku e DJ rei di kadans den aña 80, Sidney ‘El Yankee’ Amerikaan i tambe DJ Black. Riba e anochi aki, Sony Real, Tico Libiee, Urvin ‘Luwi’ Jano i Paul Welvaart lo ta bèk riba tarima ku nan banda pa basha KADANS i ZOUK. Durante e anochi lo tin varios premio di porta i tambe premio pa e bailadónan di KADANS i ZOUK ku ainda por mustra kiko nan tin aden. Karchinan ya ta na benta na Mensing Caminada i Pòmp di Gasolin Sta.Maria na rason di Naf 65,= i riba djasabra 27 di aprel awor lo tin un ‘gimmick’ den Punda kaminda lo por kumpra un kantidat limitá di karchi pa solamente 50 florin i topa e idolonan di Kadans dje tempu ei. Pues tur kos ta kla pa e anochi historiko di CURAÇAO KADANS & ZOUK REVIVAL 2019 di 18 mei awor den W.T.C. ku MAIS, TURBO, RIZAM i E.R.A. den un tremendo enkuentro musikal bailabel.