Willemstad – Después hopi antisipashon Curteez ta lansa e produkshon kontagioso titula ‘Fly’. E ‘club banger’ aki ta un kolaborashon ku kantante SENZ, ku tambe ta firma huntu ku Curteez riba e imprenta di BuzzBin Productions. Curteez a kuminsá traha riba e kantika aki dos aña pasa pero a warda te ora ela haña e vokalista korekto pa kompletá e produkshon. Curteez ta splika kon ela buska un persona ku e estilo, aktitut i bos korekto, i a enkontra esei den SENZ.

Den ‘Fly’, nan keda ilustra kon un homber ta dispuesto di hasi tur kos pa su dama, asta gaña. “Nos ke hasi e dama konsiente ku homber ta dispuesto di bula of ‘fly for di body’, Curteez a kontinúa. Curteez a haña su inspirashon komo DJ, skuchando e remesklá di Dance ku e tabata tende na radio i tabata determina pa hasi’e aún más miho. Ela a haña su promé oportunidat serka DJ Boogieman, e famoso DJ kurasoleño, unda ela kuminsá toka den e diskotèk i bich clubnan di mas grandi di Kòrsou. Na kuminsamentu di su karera, Curteez tabata remesklá hitnan pa Laser 101, un di e radionan más popular di nos isla.

Nase komo Curt Alberg na Kòrsou, Curteez a muda pa Hulanda na 1995 pa kontinúa su estudio. Alberg ta bini fo’i un famia musikal ku tabata milita den diferente banda komo músiko i kantante. Fo’i un edat hóben e tabata sa ku músika tabata su yamada, apesar di a bai Hulanda pa primeramente drenta Forsa Aéreo hulandes, pero después ku esaki no a logra, ela kuminsá traha pa ING Bank, pa kua e ta labora pa mas ku 20 aña kaba. Después ku ela haña su ritmo na Hulanda, Curteez a ekspandé su relashonnan profeshonal i pronto a kuminsá toka ront Hulanda komo DJ di músika Dance i House. Un karakterístika di Curteez ta e forma úniko ku e ta kombina e ritmonan Funky, Latin, Electro i Groovy House durante su presentashon, loke ta garantisa ku e públiko ta keda riba pía. Curteez a estabelese su mes komo un eksperto di fiestanan varia, unda e ta meskla músika di dekada 80 i 90, R&B i Hip-Hop, House – Funky, Latin, Groovy i Electro – i más. Asina e ta konosi no solamente komo e DJ ku un plan maestro, pero komo e maestro ku e un plan.

Na aña 2009, Curteez a disidí di dedika mas atenshon na e arte di DJ, unda ela kolabora ku diferente produktor talentoso asosia ku BuzzBin Productions. Adishonalmente Curteez ta traha ku e grupo di Reggaeton Ghettoflow i nan produktor MB. “Kolaborando ku MB, mi a siña hopi i mi obhetivo ta pa promé ku fin di e aña aki, mi mes por kuminsá traha tur mi mes beat”, Curteez a splika. Resientemente, Curteez a kompletá un gira promoshonal eksitoso ku nan na Chersonissos, Gresia.

Keda pendiente pa otro produkshonnan ku Curteez tin na kaminda. Pa mas informashon siguí Curteez riba ritnan sosial na e página di www.facebook.com/CURTEEZ of mail na Media@buzzbinproductions.com pa más informashon.  Fly ta disponibel na tur radio emisora popular, pues yama i pidi p’é.