Diadomingo awor di 7 di april

ORANJESTAD/ Den cuadro di Dia Mundial di Salud dia 7 di april proximo Aruba Waterpark ta invita nos comunidad y particularmente esunnan cu ta traha den sector di salubridad pa un dia di famia. Durante di e dia aki lo tin diferente actividad den e parke cu e tema ‘Un bida Saludabel’.

Dia di Salud ta wordo organisa for di aña 1950 riba dia 7 di april, cu e meta pa duna mas  atencion na algun tema di salud. E dia di famia di Aruba Waterpark lo tuma lugar diadomingo awor y ta inclui diferente actividad den e parke cu e tema ‘salud’. Lo tin les di aerobic gratis, tanto pafor y den awa, lo tin un lectura cu e tema ‘Un bida Saludabel’ y bishitantenan lo por haci un chekeo medico gratis serca Cruz Cora. Tambe lo tin un buffet saludabel den e restaurant y tur hende lo por haci uzo gratis di e piscina y e slipnan.

Empleadonan den salubridad na Aruba tin un tarea duro y tin biaha dificil pa duna servicio na grandi y chikito. Sea pa yuda nan recupera, of pa mantene e salud optimal. Ta p’esey Aruba Waterpark ta hañ’e importante pa ofrece nan particularmente algun dia contento y relahante.

Durante henter weekend- di diabierna pa diadomingo- empleadonan den salubridad lo paga unicamente 10 florin pa entrada. Por mira e programa completo riba e pagina di Facebook di Aruba Waterpark. Pa mas informacion por tuma contacto cu Lev Varela na number di telefon 660-5570.