Willemstad – Ku hopi antisipashon e kantante Tahir ta lansa e remix di ‘Einan’, e promé single di su debut álbum‘,  ku e famoso DJ Puto X. Después ku Tahir a firma ku BuzzBin Productions, e hóben talento ta trahando riba e álbum ku e ta spera di lansa mas den fin di aña. Fo’i 2014, Tahir ta kultivando su karera komo solista i a lansa varios single pa test e awanan. Na 2015, Tahir a lansa “Mi Konfeshon”, un kolabrashon ku Rafik, siguí pa “Un anochi di Tarraxinha”, su promé single komo solista. Na 2017, ela lansa e balada “Amor de Madre” i e Kizomba “Einan“. 2018 tabata un aña yen di akontesimentu pa Tahir, unda ela kolabora ku produktor MB Ghettoflow riba “Eres Tu” i tambe a traha ku e talentoso produktor Lange Sjaak riba e remix. Tambe, Tahir ta kanta den Kizzme, una banda di Kizomba ku ta kombina e influensianan kabverdiano i kurasoleño i ta presenta na papiamentu, spaño, inglés i creole Kabverdiano. Na aprel nan ta spera di lansa nan single ‘Club Domina’.

Tahir debe pallet musikal amplio na e diversidat kultural di Kòrsou i su famia, ken a ekspone na un variedat di ritmo musikal. E tin raísnan dominikana di parte di su mama i a lanta skuchando artistanan mane Romeo Santos, Daddy Yankee i Wisin y Yandel. Partikularmente ku Kizomba, e baile seduktor origina fo’i Angola, ela konekta paso e ritmo ta lagé korda e ritmonan Karibense bailabel mane Reggae, Kadans i Zouk. Ku 18 aña, Tahir a drenta e grupo di góspel di Reggaeton yama “Los 3scogidos”, pero e grupo a kibra na 2012 ora varios miembro a kuminsá  muda pa eksterior pa kontinúa nan estudio. Aktualmente, Tahir ta biba na Hulanda unda e ta studio Ingenieria Sivil.

Einan Remix

E kolaborashon entre Tahir i DJ Puto X a keda estabelese via di un konosi, ken a drenta den kontakto ku e famoso produktor francés angoles pa introdusie na e talento kurasoleño. Después di algún tempu ku Tahir i DJ Puto X tabata komunika regularmente, nan a disidí di traha riba algún produkshon huntu. E promé kolaborashon ta e remix di ‘Einan’. DJ Puto X a gusta e ‘vibe’ di e kantika asina tantu ku e kier a pone su toke angoles riba dje. Asina DJ Puto X a krea un ‘beat’ nobo según su estilo pa e remix,  i asta a haña e oportunidad pa kanta riba e kantika. E resultado ta un kaptivante produkshon di Kizomba ku ta priminti di ta un hit riba e listanan musikal internashonal. Ku ‘Einan’, Tahir ta ekspresa su sintimentunan pa un amiga, unda e ta splik’e durante un baile intenso di Kizomba, kon e ta desea di tin n’e pa semper den su brasa nan.  E ta invité pe baila kune pa asina nan konekta ku otro. Pa graba e produkshon, Tahir a bai Fransia na november 2018 pa traha ku DJ Puto X. Na Paris, nan tabata tin algún seshon di skibimentu i a drenta studio pa krea e remix i e otro produkshon ku ta bai salí den futuro. “E seshon di studio tabata hopi great i produktivo i e konekshon entre nos tabata asina evidente. Ami a gusta su ‘vibe’ i e a gusta esun dimí”, Tahir a splika.

Keda pendiente pa otro produkshonnan ku Tahir tin ku DJ Puto X ku ta na kaminda.

Pa mas informashon siguí Tahir riba ritnan sosial na e página di Facebook/BuzzBinProductions of mail na Media@buzzbinproductions.com pa mas informashon.

 Einan (produced by MB Ghettoflow) Tahir – Einan (prod By MB GhettoFlow)