Willemstad – Pa 7 di aprel próksimo, ta verwagt ku 100 boluntario rònt Kòrsou lo partisipá na Dia di Bon Akshon (Good Deeds Day), pa hasi bon na benefisio di nos próhimo i nos planeta, poniendo den práktika e simpel idea ku kada persona por hasi un bon akshon, sea grandi òf chikitu, pa mehorá bida di otro i impaktá mundu positivamente.

Good Deeds Day ta un movementu global ku ta uni mas ku 100 país rònt mundu pa hasi bon akshon. For di 2007, varios mion di persona i miles di organisashon i negoshi rònt mundu a uni tur aña pa hasi bon i yuda komo boluntario.

Spread the Love Curaçao, e inisiativa lokal dediká na akto di bondat (kindness), ta bolbe organisá Dia di Bon Akshon na Kòrsou, ku 5 bon akshon di grupo i varios akshon individual. E bon akshonnan di e aña aki ta inkluí un kolekshon di komestibel na supermarket, un limpiesa bou di awa, musik live na un kas pa hende grandi, un cleanup ku un grupo di hóben, un pago adelantá na un lugá di koffi i hopi mas.

Boluntario ainda por registrá pa un bon akshon na Kòrsou dor di manda un email pa spreadthelovecuracao@gmail.com. Hende ku no a registrá tambe por partisipá ku nan mes bon akshon individual publikando un potrèt di nan bon akshon riba Facebook òf Instagram, usando e hashtag #gooddeedsdaycuracao.

Pa mas informashon tokante Dia di Bon Akshon na Kòrsou, bishitá: www.fb.com/groups/stlcuracao