WILLEMSTAD: Djaweps último riba e dia ku internashonalmente a selebrá Dia di Síndrome di Down, Digicel tambe a bisti su ‘Happy Socks’ pa selebrá inklushon di tur esnan ku tin e alterashon genétiko. “Happy Socks” ta e meanan kolorido, ku dibuhonan alegre pintá riba dje. Esaki ta un trènt internashonalmente i e aña aki Kòrsou tambe a adoptá e kampaña. Digicel su kolaborashon i sosten na fundashonnan manera Special Olympics ku ta stimulá inklushon di tur esnan ku tin un desabilidad òf tin e síndrome di down, no ta kos di awor- esaki ya ta parti di e filosofia di empresa den tur merkado den kual nan ta operá.

Djaweps último koleganan di Digicel tambe a bisti nan ‘Happy Socks’ i a djòin Fundashon Totolika i Special Olympics pa selebrá e dia na Sambil.  Digicel a pèrkurá pa tur mucha ku no tin nan ‘Happy Socks’ risibí un. E muchanan mes tambe a haña chèns di repartí algun ‘Happy Socks’ na e bishitantenan di e mall. E lema di e aña aki, “No laga niun hende atras!” mester sirbi komo motivashon, pa huntu nos krea un plataforma di konfiansa na unda ku tur mucha ku e síndrome di down por sinti nan mes inkluí den nos komunidat.