Hopi trabou hasí i yen kara kontentu
WILLEMSTAD — Dia 10 di novèmber 2018, a lansa e di seis edishon di CURA DOET, e akshon boluntario di mas grandi na Kòrsou Banda di e famoso “Dun’un man, gan’un kurason!” e aña aki tambe a hasi uso di e tema “Bo yudansa pa un sonrisa”. Ku esaki nos a pone e enfoke riba e balor di trabou boluntario i e partisipashon di nos komunidat kompletu, espesialmente lokual esaki ta nifiká pa e organisashonnan ku ta ser yudá.
E espektativanan ta hopi despues di e éksito di e promé lustro. Den gran forma a surpasá tur espektativa ku e di seis edishon di CURA DOET. Kon grandi e akshon boluntario di mas grandi na Kòrsou por bira? Despues di e edishon aki no ta mustra ku tin señal di para den futuro serkano. Curaçao Cares, e forsa ku ta organisá CURA DOET, huntu ku Oranje Fonds i Reda Sosial, ta sumamente satisfecho ku e metanan ku a ser realisá den e seis aña ku a pasa.
Un biaha mas organisashonnan a duna oido na e yamada i e aña aki basta organisashon nobo a partisipá. Asina 6.500 boluntario a dun’un man pa por a yuda pa ku un total di 340 proyekto. Hopi kas di grandi a probechá pa hasi algu spesial ku no ta posibel tur dia. Hugenholtz, sentro pa demensia a organisá un grandioso ‘Beachparty’ pa su 68 habitantenan. Un “beach” kompletu a ser krea ku santu di laman, parasòl, BBQ i un pisina pa asina duna e dia èkstra ambiente.
Fundashon Stichting Kura Zorg a organisá “The Day for the Home-Less”. Riba djasabra e dia a kuminsá ku un kareda den bùs pa sentro di bario Wishi/Marchena pa e hende di sentro di suidat sin kas. Un dia dushi na unda nan a haña e oportunidat pa por a baña, skohe paña i sapatu nobo den un “pop-up shop, haña un pelá di barberonan di Master Barber, hasi kabei i hasi ‘pedicure’. Nan a haña un saminashon médiko di estudiantenan di Caribbean Medical University i na final nan por a saboriá di un dushi kuminda.
Hopi skol a hasi uso di e oportunidat pa hasi mantenshon i alegrá kurá di skol, ya ku esaki ta un nesesidat grandi. Kolegio Sta. Clara, Kolegio Nechi Pieters, Kolegio Santa Maria, Kolegio Hoben Positivo, Kolegio Dodo Palm, Pedro Luis Brionschool Basisschool, Casa Cuna Villa Maria ta djis algun di e mas ku 40 skolnan ku a partisipá. Organisashonnan kultural, museo i organisashonnan di medio ambiente tambe tabata bon representá.
Diferente kompania ta hasi uso di e oportunidat pa partisipá na CURA DOET komo un ‘teambuilding’ pa nan empleadonan. E ultimo wikènt a partisipá mas ku 30 kompania komo boluntario. Manera tur añanan anterior e kompanianan a kontribuí ku rekurso humano i finansiero na diferente kaminda. Skolnan tambe ta partisipá ku nan alumnonan pa laga nan sera konosí ku organisashonnan sosial i trabou boluntario i fortifiká e sentido di komunidat.
Den e temporadanan finansieramente difisil CURA DOET a duna ku e di seis edishon aki, un mínimo NAF 350.000,- ku a bai pa organisashonnan sosial i I tambe un promedio di 26000 ora di labor pa por a realisa tur e 340 proykto nan den e 2 dianan aki.
Un palabra di gradisimentu na Kòrsou kompleto, i sigur e miles di boluntario ku a partisipá pa realisá un kantidat enorme di trabou. Pabien Kòrsou ku 6 aña CURA DOET i nos ta sigui konta ku komunidat lo sigui sostené mas edishon di CURA DOET. Pa mas informashon por tuma kontakto na curadoet@curacaocares.org òf na 788-1952.