WILLEMSTAD – Djaluna mainta 11 di febrüari, Minister pa Desaroyo Ekonómiko, Steven Martina a hasi entrega ofisial di e sertifikado di ISO 9001 na direktor di Critical Communication Caribbean C3. C3, proveedor di entre otro radio komunikashon pa polis, brantwer i ambulans, a optené e sertifikashon di ISO 9001:2015. Ku esaki C3 ta kumpli ku eksigensianan estrikto internashonal pa maneho di kalidat. Esaki ta importante, pasó C3 ta brinda solushonnan ku klientenan mester por konta kuné, sigur den kaso di kalamidat.
Un partner konfiabel
di komunikashon
“Konfiabilidat i kalidat ta nos prioridat. Nos ta mira e sertifikashon di ISO 9001
komo un konfirmashon ofisial na nos klientenan ku bèrdaderamente nos ta hasi lokual
nos ta primintí”, esei segun direktor di C3 Bert Schreuders. “Nos ta
kontinuamente en buska di oportunidatnan pa mehorá.”
Kalidat haltu, transparensia i ku bista riba futuro
Segun Minister Martina e logro aki ta di importansia pa nos komunidat, mirando
ku C3 tin ku garantisá kontinuidat asta durante momentonan kritiko.
“Mehorashon di kalidat kontinuo ta forma parti di nos vishon. Nos no a
implementá únikamente e sistema di maneho di kalidat aki,
pero tambe nos a traha duru pa e organisashon ta prepará pa kambio, pa asina
nos por reakshoná rápidamente riba nesesidatnan di nos klientenan ku ta keda
desaroyá.”, esei segun C3 Quality Assurance Manager Mita Filesia.
Kiko ta
NEN-EN-ISO 9001:2015?
NEN-EN-ISO 9001:2015 ta un norma internashonal rekonosé
pa maneho di kalidat. “E norma aki ta yuda mehorá e produkto i servisio. Ademas
e por wòrdu usá pa evaluá si e organisashon ta kumpli ku e eksigensianan di e
kliente, leinan i reglamentu di e organisashon mes”, esaki segun Dik Roeland di
Quality Masters, e instansia independiente ku tabata na enkargo di e ouditoria.
Tokante C3
C3 (den pasado
konosí komo Zenitel) ya ta 80 aña aktivo den komunikashon krítiko. For di 2005,
C3 ta fasilitá polis, brantwer, ambulans, refinerianan, prisonnan, airopuertonan,
hafnan, i otro organisashonnan ku semper mester por komuniká, tambe ora por
ehèmpel e retnan di telefòn kai afó, ku ret di TETRA (Terrestrial Trunked
Radio). C3 tin ofisinanan na Kòrsou, Aruba, St. Maarten. E ta representá
markanan renombrá manera Motorola, Airbus Defence & Space, Hytera, Icom i
Iridium. Na C3 tur kos ta drai rònt di inovashon, renovashon i mehorashon.
Tambe ta hasi uso di e último teknologianan. Resultado di esaki ta komunikashon
sigur, tur kaminda i den tur situashon.
Mas informashon
tokante e organisashon, bo por haña na www.C3.cw