Port of Spain, Trinidad and Tobago- 5 di febrüari 2019-  Kompania di Tou Kòrsou (KTK) resientemente a firma un kontrakt ku National Energy Corporation  of Trinidad and Tobago ltd. (NEC), pa asistí e kompania den su operashonnan na Trinidad. Inisialmente e kontrakt tin un durashon di 6 luna. E ta enserá ku KTK ta manda un toubot ku tripulashon lokal pa supòrt operashonnan di NEC den e diferente hafnan di Trinidad i Tobago. Gerensia di KTK ta konsiderá e logro aki komo unu sumamente importante mirando ku e kompania ta lucha for di mei 2018, debí na e redukshon drástiko di e tráfiko di barkunanan tankero ku no ta yegando Refineria i Bullenbaai mas, komo konsekuensia di e problemanan rondó di PdVSA.

Loke ta hasi e proyekto aki interesante ta e echo ku KTK su propio personal lo bai traha na bordo di e toubot na Trinidad. Esaki ta un oportunidat úniko pa KTK, sigur si tuma na kuenta e kompetensia fuerte ku tin aktualmente riba e merkado di toubot den e region di Karibe.

NEC ta un kompania 100% subsidiario di ‘The National Gas Company’ di Trinidad i Tobago, ku ta un kompania di gobièrnu. NEC ta bon posishoná na Trininad i tin e mandato spesífiko di su akshonista pa manehá ekspanshon di e sektor energétiko na Trinidad i Tobago. NEC a krese fuertemente den e último 5 añanan. Konforme pronóstikonan e kompania ta spera mas kresementu di su ingresonan prosedente di e desaroyonan den e sektor energétiko na Trinidad i paisnan den bisendario. Komo parti integral di su operashon, NEC ta manehá i operá un flota di toubot moderno pa duna asistensia na barkunanan ku ta bishitá hafnan di Trinidad.

Gerensia di KTK a hiba e promé kombersashon ku NEC na yanüari 2018. Ambos partido a ekspresá interes pa traha huntu ku otro den futuro. Durante un mishon na Trinidad i Tobago na yüli 2018, organisá pa Ministerio di desaroyo Ekonómiko, Minister Steven Martina a duna su supòrt na e intenshonnan di kolaborashon entre NEC i KTK. Durante e biahe di trabou aki Minster Martina a hiba kombersashon ku diferente mandatario di Trinidad i tambe ehekutivonan di NGC i NEC. Na ougùstùs 2018, despues ku ehekutivonan di NEC a bishitá Kòrsou, a firmá un MOU entre NEC i KTK pa por eksplorá huntu posibilidatnan di koperashon entre e empresanan. Pa NEC esaki ta bira e promé bia den su historia ku e empresa ta kontratá un otro kompania, for di eksterior, pa asistié den su operashonnan marítimo lokal.  Djasabra awor KTK su toubot Mero, ku tripulashon lokal, ta planiá pa sali pa Trinidad pa por kumplí ku e kompromiso importante aki ku por kondusí na mas negoshi den futuro pa KTK.