WILLEMSTAD – Resien un grupo grandi di studiante di algun skol sekundario i tambe studiantenan di varios skol avansá a reuní den Sala Margarita na Because Entertainment Center pa risibí un sertifikado pa un preparashon práktiko ku nan a sigui titulá:‘Mini Empresa’. E preparashon a dura un aña i tabata na enkargo di Fundashon Negoshi Pikiña den estrecho kolaborashon ku dosentenan i direktiva di e skolnan: Regina Pacis, St. Paulus, SGO-Jacques Ferrandi (VSBO), Nilda Pinto, O.T.C. i Maris Stella (SBO), University of Curaçao (HBO). Meta di e preparashon ta pa stimulá sentido empresarial serka studiantenan na e nivelnan eskolar menshoná. A traha un kontenido na midí, ku enfoke riba práktika, ku ta pas ku e kuríkulo regular ku e hóbenannan aki mester sigui durate di nan estudio.

Aparte di algun diskurso di algun miembro di direktiva Fundashon Negoshi Pikiña, algun dosente i sra. Mariela Olario, den representashon di Ministerio pa Desaroyo Ekonómiko, tambe a hiba palabra algun hóben ku den transkurso di añanan a sigui e preparashon ‘Mini Empresa’ i ku dia di awe tin nan mes negoshi òf ta okupá puestonan klave den empresanan lokal. 

Ministerio pa Desaroyo Ekonómiko ya for di inisio di e proyektonan di Fundashon Negoshi Pikiña a kere den esakinan i a duna un sosten signikativo ya pa varios aña. Si tene kuenta kon desaroyo di merkado laboral a bai ultimo añanan sigur stimulashon di sentido empresarial serka hóbennan ta di un balor agregá grandi. E preparashon ‘Mini Empresa’ ta duna mas bida na e preparashon di hóbennan ku ta haña oportunidat pa amplia nan konosementu di un forma práktiko i interesante pa e hóben studiantenan. Nan ta sa mas kiko por i kiko nan mes lo ke den futuro. E meta no ta spesífikamente pa nan tur bira doño di negoshi mañan ku Dios ke, pero si pa den kaso ku nan bai laborá den un organisashon nan hasi esaki ku un sentido empresarial.

Na final di e parti di e parti ofisial e studiantenan di e diferente skolnan por a komuniká ku otro den un ambiente festivo.

Pa añanan benidero diferente otro skol tambe a mustra interes pa traha huntu ku Fundashon Negoshi Pikiña pa duna e preparashon ‘Mini Empresa’. Mas informashon lo sigui den transkurso di aña via medionan di komunikashon regular i medionan sosial.