WILLEMSTAD – Den su afan pa duna bèk na komunidat, djasabra e diler di outo Crown Automotives a ofresé un grupo grandi di miembro di Totolica e oportunidat pa un kareitje den bùs òf trùk, mas ku klaro tur di e marka Hyundai. Mainta alrededor di 10 or e 35 shofùrnan di e vehíkulonan a presentá na e showroom di Crown Automotives na Kaya Tula na Ser’i Dòmi kaminda e miembronan di Totolica ya tabata warda nan. A repartí e grupo di 50 partisipante di edat variá entre e diferente bùs i trùknan. Ora tur tabata na bordo, a kore un tèk ku nan, krusa brùg grandi, pasa entre otro na Waaigat i Saliña, pa finalmente bolbe Ser’i Dòmi despues di 12 or. Durante henter e ruta e karavana di bùs i trùk di Hyundai a haña kompañamentu di polis den outo i riba motosaikel i di vehíkulo di Krus kòrá. A lo largu di e ruta e karavana riba su mes a hala bastante atenshon di hende kant’i kaminda i di otronan den tráfiko.

Na regreso na e showroom di Crown Automotives a parti kos di bebe i paspalu pa e miembronan di Totolica, e shofùrnan ku a kontribuí gratuitamente pa un bon kousa na e evento aki, i naturalmente tambe pa e esnan di polis i Krus Kòrá ku a duna nan koperashon.