WILLEMSTAD- 23 di desèmber 2018 – Resientemente Ofisina di Turismo di Kòrsou (CTB) a lansa un seri di video nobo titulá ‘ Abo tambe ta Turismo’. Ta trata aki di un seri di videonan edukativo riba tereno di turismo.

Den kada video lo entrevistá personanan den nos komunidat kaminda ta konsientisá nan ku nan tambe ta forma parti sea direkto o indirekto di sektor di turismo. E videonan lo inkluí entrevista ku por ehèmpel un mekániko, un pintor, DJ i un bendedó di fruta. Kada persona mes lo bai mira nan balor pa e sektor di turismo. Den e promé video sr. Toni Castro ta sostené un entrevista ku direktor athunto di CTB, sr. Hugo Clarinda ku lo konta di su trabou i tambe desaroyo di turismo na Kòrsou.

Nos tur di un òf otro manera ta forma parti di sektor di turismo. Sigui Kòrsou ta Dushi riba Facebook, Instagram i Youtube pa bo por mira kada entrevista.