WILLEMSTAD.- Ayera tardi a tuma lugá e gran apertura di ‘Zeelandia 7’, un sentro komersial nobo situá na Kaya Jacob Posner # 7 na Zeelandia.

E edifisio ku tabata riba e tereno aki originalmente tabata e promé edifisio ku a keda konstruí na 1970 den e área di Zeelandia dor di Sr. Antoine Samander, dfm.

Dia e edifisio tabata kla ela bira e nightclub mas grandi di Kòrsou – “ D’Scene ”.

Na 1984 Mosaicos Samander ku tabata situá na Suffisant, dirigí pa Sra. Rosa Samander, kasa di Antoine Samander, a muda i bin establesé su mes den e edifisio ku originalmente tabata aki.

Na 2015 a sera Mosaicos Samander i a bin ku e idea pa traha un Mall bunita, elegante ku ‘units’ pa hür i amplio lugá di parker.

Zeelandia 7 ta konsistí di 26 unidat, di 100m2 te ku 300m2, ku ta brinda espasio pa boutique, sapateria, salon di beyesa, elektrónika, barberia, ofisina, banko i hopi mas. Tur unidat tin hopi servisio inkluí.

“Nos ta hopi orguyoso ku e bunita edifisio aki ku ta trese un toke di elegansia pa e área di Zeelandia”, asina yufrou Roxanne Espineira, kende a papia na nomber di famia Samander – Espineiro,  a indiká durante di su diskurso.

A skohe e fecha 19 di desèmber pa e gran apertura di Zeelandia 7, esaki ta debí ku e ta e fecha natal dje konosido komersiante, Antoine Samander, dfm. (di felis memoria).

Kafe 5999

Ayera a tuma lugá tambe e apertura dje promé establesimentu den Zeelandia 7, ‘Kafe 5999’, kaminda bo ta haña e kòfi di mas dushi, sèntwich, salada, sòpi i hopi mas.