E hecho di duna bèk na nos komunidat ta den e ‘DNA’ di Maduro & Curiel’s Bank.

Ya pa hopi aña nos Banko ta komprometé na desaroyo i sosten na nos komunidat. Un kompromiso firme di nos Responsabilidat Sosial demostrando ku e relashon sosial ku nos komunidat ta un mester!

Awendia nos ta topa ku diferente reto sosial, ekonómiko i finansiero. I trabou boluntario, duna bèk na nos komunidat, repartí balornan material i inmaterial ta e yabi pa sigui desaroyá i superá e retonan aki.

Pa e motibunan aki, nos ta apresiá inmensamente organisashonnan ku ta kompartí e mesun vishon, mishon i filosofía ku nos Banko ora ta trata trabou boluntario.

E organisashon ku durante e último 7 añanan a enfatisá e importansia di trabou boluntario, duna bèk na nos komunidat, komo tambe e importansia di e persona ku ta ehersé trabou boluntario den nos komunidat ta: Curaçao Cares Foundation.

Ta importante pa menshoná ku den 1 aña mas ku 4.500 boluntario a duna mas ku 24.700 ora di trabou boluntario na diferente proyekto di Curaçao Cares Foundation.

Un organisashon ku ta hasiendo un trabou ekstraordinario pa empoderá nos komunidat pa hasi trabou boluntario i ta mobilisá míles di siudadano tur aña pa limpia diferente área na Kòrsou (ku Curaçao Clean Up), pa mantené i drecha diferente lugá (ku CuraDoet) i pa hasi diferente tipo di trabou boluntario den kasnan di grandinan komo tambe pa mucha.

Nos ta sumamente orguyoso di anunsiá ku e aña aki pa di 22 aña konsekutivo nos ta entregá MCB Prize i e aña aki MCB Prize 2018 ta bai pa Curaçao Cares Foundation.

Curaçao Cares Foundation a establesé ofisialmente na òktober 2012 pa Lisayé de Windt i Deva-Dee Siliee. E organisashon a bira aún mas konosí den nos komunidat dor di CuraDoet i Strea Boluntario.

Curaçao Cares Foundation ta enfoká pa inspirá i empoderá individuo-, kompania- i organisashonnan pa ofresé nan tempu, abilidatnan i rekursonan komo boluntario i ta dediká na reforsá e ròl di NGO’s den desaroyo di nos komunidat.

E ròl di e organisashon ta wòrdu deskribí di siguiente manera:

Promové: Curaçao Cares Foundation ta djòin partnernan den komunidat (NGO’s) pa promové, krea òf manehá proyektonan boluntario.

Forma kapasidat: Curaçao Cares Foundation ta desaroyá training i oportunidat di siña pa boluntarionan, partnernan den komunidat i kompanianan i ta fasilitá kresementu di kapasidat di boluntariadonan pa medio di trabou boluntario pro-bono.

Sosten: Curaçao Cares Foundation ta sostené kompanianan den nan esfuersonan, dor di ofresé diferente rekurso i servisio ku ta inkluí maneho di proyekto, asistensia pa embolbí nos komunidat i sosten pro-bono di trabou boluntario.

Ofresé plataforma: Curaçao Cares Foundation tin un plataforma digital disponibel den kua boluntarionan individual i kompanianan por registrá pa keda na altura di oportunidatnan pa trabou boluntario i oportunidatnan pa siña.

Un di e aspektonan ku pa nos di Maduro & Curiel’s Bank ta mas importante ta netamente pa krea un manera struktural di boluntariado; Un esfuerso ku nos tur tin ku apoyá pasó netamente esaki ta e base pa trabou boluntario bira un manera di biba den nos komunidat. Pasó huntu nos por hasi muchu mas.

Laga nos ban pa e retonan i logra e nivel mas haltu di Positivismo pa nos dushi Kòrsou.

Un biaha mas, Curaçao Cares Foundation, nos ta orguyoso di por entrega boso e MCB Prize 2018;

Masha Masha Pabien!