SUBT den koperashon ku FFK ta organisá un klínika pa damanan ku ambishon pa e deporte di futbòl di 6 pa 21 aña di edat. E klínika ku ta karga e nòmber; ‘Curaçao’s Mission for Woman’s Football’, lo ta na enkargo di e entrenadó di dama i ‘scout’ pa KNVB, Renée Slegers.

Renée Slegers ta un eks futbolista profeshonal ku for di aña 2009 a partisipá na diferente partido internashonal den e selekshon nashonal di dama di Hulanda. Tambe ela militá den diferente ekipo manera; Arsenal, Willem II, Djurgardens IF i Linköping di kual ela titulá kampion di Suesia na aña 2016. Debí na un leshon na rudia su karera komo futbolista a terminá i aktualmente e ta un entrenadó diplomá na Suesia.

Aktualmente Renée Slegers ta na nos dushi isla i lo kompartí un tiki di su konosementu na e damanan di Kòrsou ku ke sa mas di e deporte rei, futbòl.

E klínika aki lo tuma lugá djadumingu, 16 di dezèmber di 8:30am-12:30pm na Stadion Dr. Antoine Maduro (SUBT) i e ta kompletamente grátis!

Meta di e klínika aki ta pa promové i engrandesé futbòl di dama aki na Kòrsou i ta e intenshon pa den futuro sigui organisá mas di e tipo di eventonan aki pa nos damanan.

Riba e dia aki un i tur por siña diferente téknika di futòl i despues tambe lo tin un torneo chikí pa pone den práktika tur loke a wòrdu duná durante e klínika.

Tur ku ke partisipá por registrá na infoewmanagement@gmail.com.

Pa mas informashon por tuma kontakto ku Sra. Erica Wever na 5146883.

Bo ta un dama di 6 pa 21 aña i ke kuminsá práktika futbòl òf ta áktivo den un ekipo kaba?

Bo ke amplia bo konosementu i bira mas mihó riba tereno?

Inskribí awe mes i probechá di e tremendo oportunidat aki!

Nos ta warda bo, djadumingu 16 di dezèmber, den Stadion Dr. Antoine Maduro!