Willemstad – Djabièrnè 6 di desèmber a tuma lugá apertura di e Thrift Store di GiroCares. Durante di e grand opening aki prensa a haña e oportunidat di kaptura imágennan di e thrift store pa asina komunidat por mira e resultado final di nan kontribushon. GiroCares, e fundashon di Girobank ku ta kere den e importansia di duna bek na nos komunidat pa medio di  trabou boluntario, den kolaborashon ku Curacao Cares ta e motor tras di e tremendo Thrift Store aki. Dia 23 di novèmber GiroCares a tene un ‘Clothing Drive’ kaminda pueblo di Kòrsou a kontribuí en grandi dunando un total di kasi 32.000 kilo di paña, sapatu i asesorio. E pañanan rekoudá durante e Clothing Drive, a wòrdu surtí, labá, drechá i awor a drenta e GiroCares Thrift Store. Via di instansianan sosial GiroCares a invitá tur esnan ku por hasi bon uso di e pañanan aki. Finalmente e tienda a resultá den un lugá agradabel pa shòp, ku un surtido enorme. Pa e wikènt aki no ménos ku 750 persona a keda invitá pa bin shòp den e Thrift Store. Pa sigurá ku e invitadonan por shòp den tur trankilidat, a opta pa no duna publisidat na e lokalidat di e Thrift Store. GiroCares huntu ku Girobank ta yama un danki di kurason na un i tur ku a aportá di un òf otro forma pa hasi tantu e Clothing Drive komo e Thrift Store aki un realidat. Girobank lo sigui ta komprometé ku bo.