WILLEMSTAD- 8 di desèmber 2013 – Sifranan kolektá pa Ofisina di Turismo di Kòrsou (CTB) ta indiká ku un total di 361,475 turista di estadia a keda registrá durante e promé 10 lunanan di 2013.  Esaki ta un oumento di 5% kompará ku 2012. Aña pasá a registrá 345,408 turista di estadia. Pa e region di Nort Amérika nos a risibí un kantidat di 60,517 turista. Esaki ta un oumento di 2% kompará ku 2012 riba e mesun periodo. E region di Sur Amérika tambe a  konosé un subida di 11% kompará ku aña 2012. Na 2013 a registrá un kantidat di 107,726 turista, kompará ku 97,127 na 2012. Pa loke ta trata e region di Karibe nos a risibí 32,605 turista ku ta un bahada leve di 1% kompará ku 2012. Miéntras e kantidat total di turista di estadia registrá pa e region di Europa ta mustra un bahada di 2% pa loke ta trata e promé 10 lunanan di 2013. Na 2012 e kantidat total di bishitante di estadia registrá tabata 148,267 kompará ku 145,048 te ku òktober 2013. Mester remarká ku e kantidat di anochi ku e turista a keda Kòrsou kompará ku 2012 pa loke ta trata e promé 10 lunanan di aña a konosé un bahada . Un total di 3,043,125 anochi a keda registrá. E region di Nort Amérika a konosé un bahada di 2%, Karibe a konosé un bahada di 3% miéntras ku e region di Europa a registrá un bahada di 4%. E region di Sur Amérika si a registrá un subida di 6%. Pa loke ta trata e promé 10 lunanan di 2013 mayoria di e bishitantenan a skohe pa keda na hotèlnan ku nos ta kategorisá komo hotèlnan grandi  (hotèl ku mas ku 150 kamber) i na adrèsnan priva. E kantidat aki por keda repartí den 33% pa hotèlnan grandi i un kantidat similar pa adrèsnan priva. Un kantidat di 14% a skohe pa un bungalow, un kantidat similar esta 14% a keda na hotèlnan chikí, pues hotèlnan ku ménos ku 150 kamber i 5% a skohe pa keda na un apartamento. E entrada ku sektor di turismo a generá e promé 10 lunanan di 2013 a keda kalkulá na 329.1 mion US$. Esaki ta mas ku e kantidat ku a keda generá aña pasa durante e mesun periodo,  kaminda esaki tabata 309.8 mion US$. E kalkulashonnan aki a keda hasi dor di e departamentu di investigashon di CTB i MEO hasiendo uso di e modelo ‘Turistika’. Ku e modelo aki por hasi kalkulashon di e ganashinan ku e sektor di turismo ta generá basá riba e kantidat promedio ku e turista ta gasta durante su bishita riba nos isla.