ORANJESTAD – NOV– Aña pasa e tabata un exito rotundo y e aña aki ta sigur cu e no por keda for di e celebracion di Pasco na Aruba. Renaissance Marketplace su Christmas Market Winter Wonderland ta habri diasabra awor y ta sigur cu un biaha mas e lo ta centro di ambiente pa e fin di aña aki. E Christmas Market Winter Wonderland lo ta habri tur dia for di 6’or di atardi pa 10’or di anochi- te cu dia 23 di december proximo.  Renaissance Marketplace ta bolbe eleva e experencia di Pasco!

Ambiente, goso y schaatsmento

Claro cu e Ice Skating Rink mester tey; aña pasa e’la percura pa hopi momento di goso. Mayornan a bishita e Christmas Market Winter Wonderland cu nan yiunan pa schaats y comparti momentonan inolvidabel. E plataforma di ijs lo ta situa net mei mei di Renaissance Marketplace y ta accesibel pa tur hende.  Lo tin ambiente y live entertainment tur dia. Por spera presentacion di Las Unicas, Grupo di Betico, Claudius Phillips & OREO, Rincon Boyz, Robert Jeandor y Su Solo Banda Show, Honeypot  y mucho mas.  Renaissance Marketplace ta invitabo pa celebra e anochinan di Pasco cuminsando diasabra awor dia 1 di december cu e gran apertura di Christmas Market Winter Wonderland!

Meet & Greet Santa!

Haci un paseo den e Christmas Market Winter Wonderland y ‘meet & greet’ Santa y su ayudantenan. Saca foto y disfruta di momentonan bunita den famia. E ‘ciudad’ di Pasco na Renaissance Marketplace lo tin diferente ‘casita’ di Pasco bendiendo cuminda, bebida y regalonan netamente navideño. Ademas di esey, lo tin diferente actividad pa mucha manera contamento di storia y mucho mas. Sigui Renaissance Marketplace riba social media y keda na altura di Christmas Market Winter Wonderland!