Dia 22 di desèmber próksimo

Djasabra 22 di desèmber ta dia ku despues di hopi tempu, nos lo por bolbe disfrutá di un konsierto di nos gran artista Ced Ride; un konsierto di fiesta, alegria i amor selebrando 50 aña di su éksito “Navidad sin padre”.

Tabata na aña 1968 ku Ced Ride a partisipá na un konkurso di kompositornan di Aruba, Boneiru, Saba, St. Eustatius, St. Maarten i Kòrsou, organisá pa fundashon PRODEKA bou di presidensia di Teo Hermelijn ku e piesa “Navidad sin Padre”. Di Kòrsou a partisipá e.o. Boy Dap, Humberto Nivi i Rudy Plaate. Dia 14 di novèmber e piesa a sali riba e lòngplay di e banda Los Dangers bou di e seyo di Grabaciones Gordito de Oro i dia 15 di desèmber di mesun aña den show di Angel Job a estrená e kansion. Ku e kansion aki Ced a gana TAMBU DI ORO, su promé premio nashonal den farandula.

Manera ya menshoná, e konsierto lo tuma lugá dia 22 di desèmber na Sentro pa Desaroyo Integral dr. Israel Leito na Barbadosweg . E anochi lo konta ku bendishon di Pastor Curtis Meris i tambe presentashon di Reinier Lijfrock, Aemy Niafeliz Felicia, Ebony Albertus, Kor Sta. Famia i tambe e poëta Ralph Winedt. E anochi aki, aparte di su éksito “Navidad sin Padre”, Ced Ride lo interpretá varios di su éksitonan di tur tempu i tambe lo tin algun kansion nobo.  MC lo ta e konosido Finchi Statia.

Pa loke ta parkeo, a tene debido kuenta ku kaminda pa stashoná vehíkulo. Tin oportunidat pa hasi esaki naturalmente na e sitio di evento mes, pero tambe na Juan Pablo Duarte, unda lo tin tròli ku lo sòru pa transporte pa i for di e sitio di evento. Mas ku klaro lo tin seguridat pa vehíkulonan!

Karchinan ya ta na benta na Mensing’s Caminada, Tik Tak, Beep Beep i tambe 24 Uur uit de Muur. Tin un kantidat limitá optenibel den prebenta na rason di fl. 40,-. Despues di esei, e preis lo ta fl. 50,-.

Pa reservashon i/òf kompra di karchi, por yama na 670-1158.