Cu subsidio di Lotto pa Deporte

E dos atletanan Chester Hill y Renze Postma kendenan ta forma parti di e pre-seleccion di Aruba Triathlon Association a biaha pa Key West Florida unda nan lo competi den e di 4th Key West Sprint/Olympic Triathlon. Hunto cu nan a biaha head coach di Aruba Triathlon, Sr. Nicolaas Robert. E evento di Triathlon lo tuma lugar diasabra 7 di december na Higgs Beach , Key West. Chester lo participa na Sprint distance cu ta landa 0.75 km – core bais 20 km – core na pia 5 km. Di otro banda Renze lo competi den e Olympic Distance cu ta landa 1.5 km – core bais 40 km – core na pia 10 km. Ambos atleta tin un record fenomenal den 2013, Hill mescos cu Postma tin numeroso titulo riba nan nomber, tur dos ta campeon nacional den sprint triathlon den nan respectivo categoria, tambe nan a logra truinfa den e Aruba International Triathlon. Pa loke ta nan prestacion den competencianan den exterior ambos atleta a haci un tremendo papel. Na Edmonton, PATCO Triathlon Junior Panamerican Cup 2013 na Canada, Renze Postma a logra un di 18 lugar den e Junior Elite marcando un tempo di 1:00:05. Durante di  e Weganan Suramericano di Hubentud cu a tuma lugar na Lima, Peru, Chester Hill a logra medaya di plata den Mix Relay Triathlon. Comision di Subsidio cu financiamento di Fundacion Lotto pa Deporte semper a apoya e deporte di triathlon, e organisacion di triathlon semper a traha duro na bienestar y progreso di nan atletanan. Den competencianan internacional bishita, e atletanan a sa di saca cara y regresa cu varios medaya bek Aruba. Na banda di esaki, Aruba Triathlon ta cumpli cu e exigencianan stipula pa e Comision di Subsidio. Comision di Subsidio y Fundacion Lotto pa Deporte kier a desea atletanan Hill y Postma como tambe coach Robert tur clase di exito na Key West, Florida.