ORANJESTAD, Aruba – November 2018: Diadomingo mainta hopi mucha hunto cu nan mayornan a yega Aruba Ports Authority (APA) wardando yegada di Sinterklaas y su Zwarte Pietnan riba barco. Aruba Bank ta contento di a aporta un biaha mas na e yegada di Sinterklaas den fin di siman.

Sinterklaas y Zwarte Piet a sali for di APA y a bay rumbo pa Plaza Betico Croes pasando riba L.G. Smith Boulevard unda mas mucha tabata para banda di caminda. Tur mucha tabata saluda Sinterklaas y su Pietnan, kendenan tabata cana cu nan saco yen y tabata parti mangel mientras cu algun tabata haci show.

Na Plaza Betico Croes hopi mucha di diferente edad tabata bisti cu nan t-shirt di Sinterklaas. Cu yen di entusiasmo nan tabata warda e yegada di Sinterklaas y Zwarte Piet. E ambiente na Plaza Betico Croes a sigui cu diferente actividad. Sinterklaas a parti regalo, mientras cu Zwarte Piet tabata entretene e muchanan. Tur presente a disfruta di e show di grupo di baile infantil y hubenil, sin lubida e kids corner.

Aruba Bank ta desea Aruba un celebracion sano di Sinterklaas y pa tur bon muchanan ricibi nan regalo cu tanto nan tabata warda riba dje.