Djaweps atardi na Riffort Village, Fundashon J.A.G. huntu ku Gobièrnu di Kòrsou den persona di Minister sra. Marilyn Alcala – Walle a hasi e apertura ofisial di e temporada di Karnaval 2019.

Maestro di seremonia sr. Giovanni Abath a yama bon bini na tur invitado i miembronan di prensa, pa despues introdusí sr. Hubert “Juni” Aniceta komo Presidente di Fundashon J.A.G.. Juni Aniceta a bolbe gradesí i yama danki na Sektor di Kultura ku tabata den representashon di Minister Alcala – Walle, pa e konfiansa i sosten duna na e fundashon durante di e periodo di Karnaval 2018.

Segun sr. Aniceta e vishon di Fundashon J.A.G., ta pa sigui traha duru pa trese inisiativanan, inovashonnan pa gruponan, atraé mas turista i keda hasi esaki pa 2019 tambe. Sr. Aniceta ta kere ku e periodo di yanüari pa mart 2019, Kòrsou lo bira “the place to be”. E la bolbe gradesí tur persona, instanshanan, partnernan, medionan di komunikashon, di kurason i a primintié di sigui traha na bienestar di Kòrsou su Karnaval.

Juni a introdusí su team, kaminda ku semper e ta esun ku ta sali dilanti pero ku e tin un team fuerte para su tras. Di parti di Gobièrnu di Kòrsou, sra. Minister Alcala – Walle a bolbe enfatisá su satisfakshon na e manera ku e Fundashon nan a bin ta traha huntu manera ku e TOR ta bisa, na nòmber tambe di sra. Lisette Sambo – Velder, i ku manera e Destaho Públiko ta bisa ku despues di dos aña lo evaluá pa wak si ta sigui traha ku e Fundashon nan aki.

Komo “Baluarte” di e aña 2019 a ser skohe sr. Philip “Fifi” Rademaker i komo “Pila pa Karnaval 2019” a keda skohe “Coca Cola”. Sr. Rademaker a keda sumamente agradesido, kontentu ku a kòrda riba dje. Mas ku 30 aña e la traha, kana i yuda karnaval di Kòrsou. Ken no ta kòrda e karosa di Grupo Globo “Makaku” ku a kima dos dia promé ku gran marcha, sr. Rademaker ku su team a harma esaki bek pa e por a subi kaya pa gran marcha.

Sr. Juni Aniceta huntu ku sra. Lisette Jansen di FKBB a pasa huntu riba e kalendario pa Karnaval 2019. Sra. Jansen a introdusí parti di su direktiva pa Karnaval di Banda Bou 2019, ku lo selebrá 50 aña di eksistensia. Nan a splika di e apertura nan i ku pa e aña 2019 Banda Bou lo tin su apertura atrobe komo ku ta 50 aña di selebrashon. Tambe pa tene kuenta ku e marcha di skolnan lo tuma lugá dia 01 mart 2019 ku mas di 3500 mucha. E chèri riba e bolo ta ku dia 05 yanüari 2019, lo tin apertura di “Carnaval Village” ku lo tuma lugá na Stadion di Ref. Ku aktuashon di Gentz, ICONS by GIO i for di eksterior nada mas ku “KASSAV”.

Sr. Juni Aniceta a introdusí tambe riba e atardi aki sra. Niata Augusta, ku ta esun ku huntu ku Fundashon J.A.G. i Fundashon Alelimo lo enkargá ku organisá Festival di Tumba Hubenil 2019. Manera ya ta konosí den wikènt tras di lomba tabata tin dos dia di Preselekshon, kaminda ku 15 hóben a pasa pa e final ku lo tuma lugá dia 19 yanüari 2019, na Kleine Werf. Karchinan pa e aktividat aki ya ta na benta. Tambe e hóbennan a skohe i a sa ku kual banda musikal nan lo bai presentá e atardi aki. E banda nan ku lo kompanan e 15 hóbennan aki lo ta, DOLCE Band, YMG i HYPE.

Den e siman aki Fundashon J.A.G. a anunsiá huntu ku KJ-74 Foundation e bunita gesto pa toka “GRATIS” pa tres grupo den e Marchanan Hubenil 2019. Riba e atardi aki e 8 gruponan ku tabata presente na e reunion a haña e oportunidat di skohe un number i sa ken lo bai ku ICONS by GIO den Marcha Hubenil. E gruponan ku a sali ta no.1, Sweet Party Kids, no.2, The Bito’s i komo no.3, Grupo Little Twinkles. Pero sr. Shurendi Pieternella ku ta presidente di Grupo Sweet Party Kids a opta pa regalá Grupo Ambiente Hubenil e premio pa ta huntu den marcha ku ICONS by GIO komo muestra di gradesimentu na sra. Joan ku a hasi hopi pe.

Na final a presentá e partisipantenan pa Reina, Prens i Pancho pa Marcha Grandi 2019 na públiko i prensa, kaminda nan por a skohe nan numerashon pa e anochi di talento i anochi final. E parti aki ta kai bou di sr. Shurendi Pieternella ku huntu ku su team tin tur tres elekshonnan pa e tres marchanan na su enkargo.

Fundashon J.A.G. huntu ku Gobièrnu di Kòrsou i Fundashon Karnaval Banda Bou ta deseá i spera ku #HUNTU nos lo selebrá un Karnaval 2019 na pas i kontentu.