WILLEMSTAD – Avila Beach Hotel a alkansá un rèkòrt nobo pa medio di e ‘Online Booking’ wèpsait di Expedia. E hotel mas bieu operashonal na Kòrsou, ta e promé hotèl ku no ta ‘all inclusive’ riba e isla akí ku den menos ku un aña (ya den luna di òktober) a surpasá e totalidat di 1 mion ‘US Dollar’ den sifra di benta di kamber via Expedia.

Gerensia di e hotèl a invertí bastante den e añanan ku ta tras di lomba den renobashon di e kambernan di hotèl, playa privá i tambe restorantnan i barnan di e hotèl. Anteriormente den e aña akí un renobashon kompletu a tuma lugá di e fachada di e manshon original i konhuntamente tur 40 kamber den e edifisio ‘La Belle Alliance’. Na aña 2016 Avila Beach Hotel a implementá a la bes un strategia ‘online’ nobo ku ya ta dunando su frutanan mas i mas.

Gerente General Robbin Vogels: “Mas di e reservashonnan ‘online’ ta drenta via di nos mes wèpsait, pero nos ta mira ku globalmente e hotèl ta ganando popularidat, sigur dor di ‘online booking’ wèpsaitnan grandi manera Expedia i ku esaki nos ta mashá kontentu i orguyoso. Optené e logro importante akí ta ademas e resultado di un kolaborashon bunita i plasentero ku e grupo di Expedia i ta demonstrá ku tin desaroyonan positivo tambe ku ta tuma lugá riba tereno di hospitalidat na Kòrsou.”