Dia 7 i 8 di novèmber ta tempu atrobe pa e Studie en Beroepenmarkt ku ta tuma lugá tur aña den WTC. Aki alumnonan di skol por sera konosí ku estudionan ku nan por sigui despues di skol sekundario. Den koperashon ku Studie en Beroepenmarkt, 11 Young Professionals di ENNIA ta bai kombersá ku alumnonan di skol tokante nan eksperiensha ora nan mester a skohe un estudio. E Young Professionalnan akí no tin 30 aña ainda, i a kaba nan estudionan bastante diverso resientemente. Na momentu ku e Young Professionalnan akí mester a skohe un estudio, nan tur a skohe pa e estudio ku a parse nan mas interesante. Awor akí tur tin un trabou dushi huntu ku hopi kolega dushi tambe.

“Huntu ku mi koleganan nos ke yuda e alumnonan di skol ku eskoho di nan estudio, kompartiendo nos eksperiensha ku nan. Nos por motivá i inspirá nan. Nos ta spera ku nan ta drenta un temporada di estudio hopi dushi, i ku despues di esaki nan ta haña un trabou ku nan gusta tambe. Ta parse nos hopi leuk pa kòmbersá ku e alumnonan tokante posibilidatnan eksistente i duna nan konseho”, sigun Denice Pinedoe, 25 aña i Product manager Schadeverzekeringen riba departamentu di merkadeo di ENNA.

Ku mensahenan di video kòrtiku riba social media, e Young Professional nan a invitá alumnonan di skol bin kombersá ku nan na stènt di ENNiA tokante nan eskoho di estudio.