Despues ku a yega na areglo ku Inspekshon di Belasting

WILLEMSTAD – Awe tardi, durante un happy hour ameno den showroom na Kaya Tula riba Ser’i Dòmi, e diler di outo Crown Automotives a retorná na 8 shofùr di taksi ku Inspekshon di Belasting a aprobá, e OB (impuesto riba volúmen di benta) ku a kobra nan dia nan a kumpra un bùs nobo marka Hyundai pa nan trabou.

Pa basta tempu kaba shofùrnan di bùs i taksi a apelá na eksonerashon di OB pa kompra di un vehíkulo nobo. Sinembargo, e dilernan di outo pa lei ta obligá na kobra OB riba tur benta di outo i pa traspasá e plaka aki na Ontvanger di Kòrsou, amenos ku formalmente por proba i presentá un eksonerashon pa esaki. Crown Automotives a kumpli kabalmente ku su obligashon legal den esaki.

Pa hopi tempu Gobièrnu tabata kontemplando e base legal pa eksonerashon di OB na kompra atraves di un diler di outo, pero esaki tabata karesé di lei. Resientemente Inspekshon di Belasting a konfirmá ku awor si e eksonerashon anteriormente menshoná a haña un base legal for di dia 1 di yanüari 2017. Ku esaki e grupo di shofùr por haña restitushon di e loke nan a paga na OB ku forsa retroaktivo te dia 1 di yanüari 2017. Den e periodo ei Crown Automotives a entregá un total di ocho bùs Hyundai H1 pa kua ya a paga OB.

Despues ku Inspekshon a husga i aprobá e petishonnan individual pa restitushon di e loke a paga na OB, na kuminsamentu di e siman aki a yega na un areglo ku Inspekshon pa debolbé e pago di OB na e shofùrnan di taksi. E ocho shofùrnan di taksi tin di firma un komprobante ku nan a risibí e chèk na balor di e suma di OB ku nan a haña bèk i ku esaki Crown Automotives na su turno por haña e sèn bèk di Servisio di Belasting loke el a traspasá dimas.

Pa huntu formalisá e areglo ku a yega n’e ku e shofùrnan en kestion, Crown Automotives a kombiná esaki ku un happy hour ameno. Djaweps atardi 5 or e shofùrnan di taksi ku nan bùs nobo di Hyundai a bin tuma nan chèk, kaminda no únikamente a ofresé nan un refresko i pasapalu, pero nan a haña tambe un rekuerdo spesial den forma di un tèrmo pa tene algu di bebe sea friu òf kayente durante ku nan ta riba kaya. Na e sitio mes nan a haña e promesa ku tur taksi di Hyundai ta haña un deskuento riba piesa i servisio na Crown Automotives.