Nan tin 13 dia pa terminá e trabounan

WILLEMSTAD.- E konstrukshon di ‘The Flying Dutch Curaçao’ a kuminsá ayera, djabièrnè 12 di òktober. E tim di konstrukshon tin 13 dia pa hasi entrega di e sentro di festival riba e lugá di parker di Mambo Boulevard. Riba djaweps, 25 di òktober pa 6 or di atardi ‘The Flying Dutch Curaçao’ ta kuminsá, segun e organisashon e festival di ‘dance music’ di mas grandi di e área di Karibe.

Djabièrnè, bou di direkshon di Massive Productions a kuminsá ku e trabounan pa traha e tarima grandi. For di e momentu ei 30% di e lugá di parker na banda robes a keda sera pa dje forma ei trabounan di konstrukshon por tuma lugá. Seguidamente riba djaluna, 15 di òktober, henter e banda robes di e lugá di parker lo wòrdu será pa e diferente fasetanan di konstrukshon. Finalmente e tereno lo ta e sitio pa 5.500 amante di bon ambiente, un área di kuminda i otro ambiente.

E área banda di Adventure City tambe ta wòrdu drecha pa sirbi komo sitio di parker pa e evento. Bisiñanan, doñonan i empleadonan di Mambo blvd ya ta informá di e kambionan di tráfiko. Manager dje proyekto, Herman ‘Manchi’ Harms a bisa di ta masha kontentu ku e koperashon ku Cordelco i e doñonan i hürdónan di Mambo. ‘E interes internashonal pa e festival ta superá tur espektativa i esei ta un motibu pa ta orguyoso ku nos a trese e evento aki Kòrsou i por duna un empuhe na nos turismo’, asina Hermans a indiká.

‘The Flying Dutch Curaçao’ ta tuma lugá riba djaweps, 25 di òktober riba e lugá di parker di Mambo blvd for di 6 or di atardi pa 1 or di mardugá. E mundialmente konosí DJ Armin van Buuren pa promé biaha lo ta na Kòrsou huntu ku Sunnery James & Ryan Marciano, Lucas & Steve, Sevn Alias, Jeon i Menasa.

Entrada general i karchinan pa e sekshon di ‘standing VIP’ ta optenibel via www.theflyingdutchcuracao.com i tambe via di e puntonan di benta konosí na Kòrsou: 24 uur uit de muur, Van den Tweel Zeelandia, Mensing’s Caminada, Miles Jazz Cafe, Bruna, Bottles en Madero Lifestyle Store.