Dia 22 di novèmber próksimo

WILLEMSTAD.- Priceless Moment ta presentá un konsierto – show elegante ku hopi klase dia 22 di Novèmber 2018 próksimo. E konsierto – show aki lo ta unu diferente for di tur otro. ‘Thanksgiving’ no ta wòrdu selebrá hopi aki na Kòrsou i pa e motibu aki nos ta trese e konsepto aki den forma di un konsierto pa por konsientisá un i tur ku Semper bo mester ta agradesido.

No opstante e situashon ku bo ta pasando aden semper keda positivo i ta agradesido. “Look at the bright side of things” i saka e mihó for di dje, esaki den famia, amistat, kompania ets. ‘Thanksgiving’ no tin diferensia den rasa, kredo, religion i òf kolo.

Priceless por hasi e konsierto aki posibel danki na “Dennis Aalse Big Band” i “Team Quality Sound” i e kantantenan Yumaira Grijt i Heinrich “Rich” Pieter. Pa e chèri riba e bolo lo tin un artista internashonal huntu ku nos artistanan lokal riba tarima “Tony Succar” ku ta nominá pa ‘Latin Grammy Award – Best Tropical Song’ ku e kansion “Me Enamoro Mas De Ti”.

Tony Succar ta un produktor, multi-instrumentalista, kompositor/areglista ku a kuminsá na un edat relativamente tempran den su bida den e mundu artístiko. Tony a nase na Lima, Perú, i wòrdu lanta na Miami, Florida. Tony su inspirashon di músika ta salsa, jazz, pop i afro-latino.

Tony Succar su álbum mas resiente “Unity – The Latin Tribute to Michael Jackson” a resultá un tremendo éksito, alkansando Billboard’s #1 Tropical Album Music Chart, iTunes #1 World Latin Chart, i Amazon’s #1 Latin Pop Music chart pa menshoná un par.

Succar ta i a traha ku diferente artista manera Tito Nieves, India, Jon Secada, Marc Anthony, Sheila E., Arturo Sandoval, Judith Hill, Obie Bermudez i diferente otro artista mas.

Priceless Moment ta invitá tur hende pa sigui su página di Facebook https://www.facebook.com/PricelessMomentProductionsEvents/ i medionan di komunikashon pa mas detaye ku lo sigui duna den e simannan benidero. Otro siman lo anunsiá puntonan di benta di karchi.