Na momento ku, un grup-o di siudadano bou di direkshon di sr. Omalio Merien, tabata tene diferente reunionnan pa reòrganisá Karnaval di Kòrsou, tabatin varios gritunan for diferente skina, pa ban usa Karnaval pa promové nos turismo. E idea básiko di nos karnaval tabata , ku e mester bira un aktividat ku nos propio karakter i nos propio estilo.

Esei a pone tambe ku den seno di Asosiashon di Músiko e tempu ey, a kuminsá diskuti, pa introdusi , un ritmo di nos, den karnaval, meskos ku Trinidad tin su Calypso, i Brazil tin su Samba.

Despues di varios reunion. direktiva di Asosiashon a aserká Komité Karnaval 1971, presidí pa sr. Omalio Merien, pa trata un posibel introdukshon di nos ritmo di tumba komo e ritmo ofisial di karnaval.

Direktiva di Amak bou di direkshon di Peng de Windt (dfm) a reuní ku Komité Karnaval 1971 dia 12 di novèmber 1970 na Hotèl Avila, pa riba petishon di miembronan,pidi Komité pa aseptá tumba komo ritmo di marcha di karnaval.

Nos tin ku duna tur elogio akinan, n nos tata di tumba, Anselmus Boy Dap, kende a forma parti di e promé direktiva di Asosiashon. Despues di basta diskushon, Peng de Windt i su direktiva a konvensé Komité karnaval, pa bai di akuerdo ku e proposishon.

E desishon aki tabata unu korekto, pasobra bo no por propagá bo Karnaval, ku ritmonan . ku no ta di bo.

Pues, e motibu ku a hasi nos ritmo di tumba , e ritmo ofisial di karnaval, ta pa huntu ku e demas ingredientenan, nos promové nos karnaval konforme nos identidat, ku nos muzik, nos trahenan i nos ambiente. Último añanan a bira notabel, ku durante “jump-up”nan i marchanan di karnaval, mas i mas ta hasi uso di otro ritmonan, ku no ta e ritmo di tumba.

Nos ta hopi kontentu, ku na ougùstes 2015, e lei a drenta na vigor , pa protehá nos artistanan den desèmber i durante di Karnaval, meskos ku ta e kaso na Aruba, pa asinaki tambe duna protekshon na nos ritmo di tumba.

Promotornan tin henter aña pa òrganisá aktividatnan internashonal, pues ta na su lugá pa den luna di desèmber i temporada di karnaval, kontratá nos artistanan lokal, pa nan por gana algu èkstra, pa kubri e defisit di e lunanan di aña kaminda e situashon tabata hopi difísil.

Danki dios, gran parti di nos pueblo i nos medionan sosial, ta apresiá i popularisá nos festival di tumba, i pa di e forma ey, e aktividat por mantené su kabes riba awa. Ban respetá nos ritmonan lokal, nos artistanan i nos kultura. Ban aportá na kreashon di un “Nation Building” bèrdadero.