ORANJESTAD, Aruba – 12 di October 2018: E ultimo simannan tin hopi discusion rond di proyectonan di hotel pendiente ehecucion. AHATA ta realisa cu e desaroyonan di cual a otorga un permiso caba den pasado ta dificil pa cancela, pero ta recomenda pa Gobierno emiti un moratorio riba proyectonan nobo. “Nos ta boga pa Gobierno nenga tur proyecto cu por ainda. Nos ta contra pa mas desaroyo nobo na Eagle Beach of na Palm Beach. Ambos area ta satura caba”, asina Tisa LaSorte, Presidente y CEO di AHATA a aclaria.

Mas leu e ehecutivo di AHATA a enfatisa cu e fenomeno di sobre capacidad no ta ofrece un ambiente pa atrae turistanan di calidad halto, manera nos tur ta desea. Ya caba cu loke nos tin, e areanan ariba menciona ta yen y como tal mas desaroyo lo por tin un efecto menos beneficioso pa nos isla.

Di otro banda, AHATA ta kere cu e permisonan cu ta otorga caba y cu ta pendiente pa nan ehecucion, mester por bira propiedadnan na nivel di 4 of 5 strea. Y pa proyectonan den futuro mester enfoca mas riba propiedadnan tipo “Boutique-Style” pa San Nicolas. Mester tene na cuenta cu e turistanan considera como “millennial traveler” ta busca experiencianan experimental y como tal ta masha interesa den origen y cultura di e isla unda nan ta bishita. “Cu e realidad ey den mente, Aruba mester prepara pa e ola nobo di turistanan aki, pa nos tin un oferta cu ta cumpli cu nan deseo di explora. San Nicolas por representa nos area cultural.”, di acuerdo cu Tisa LaSorte di AHATA.

Na final, miembronan di AHATA ta hopi preocupa cu Aruba no ta dispone di suficiente empleadonan cualifica pa yena vacaturanan den turismo, si acaso nos sigui cu plannan pa expande cantidad di cambernan di hotel. Esaki por resulta den un nivel mas abou di servicio.

A funda Aruba Hotel and Tourism Association (AHATA) na 1965 pa representa e sector di turismo di Aruba. AHATA ta representa na mes momento 100 miembro cu ta companianan dunando servicio den turismo y ta emplea un gran parti di empleadonan riba nos isla. Su miembresia ta varia for di hotelnan, timeshare, operadornan di tours y watersports, y mas companianan grandi y chikito den e sector. E rol primordial di AHATA ta pa influencia exito sostenibel pa e industria turistico di Aruba.