Awe nochi den Club Vanilla

WILLEMSTAD.- Preparando pa e festival di EDM di mas grandi di region di Karibe, The Flying Dutch’ ta presentá awe nochi, 11 di òktober ‘Curaçao Dj Battle’. Nuebe talentoso dj lokal lo kompetí ku otro den 6 rònt di presentashon, repartí riba 2 anochi i nan lo wòrdu husgá pa un kuerpo di hurado ku ta konsistí di profeshonalnan den e materia.

E ganadó di e ‘Dj Battle’ lo ta e ‘opening act’ di e festival i lo presentá riba e mesun stage ku e 5 biaha # 1 dj di mundu, Armin van Buuren i e otro dj-nan ku ta streanan mundial.

E grupo di 9 dj partisipante ta: dj Grizzly, dj Miigo, dj Nexus, dj Raymi, dj Tr3z, dj Trgxz, Ethan Morris, Jay Stax i dj Jowie.

E partisipantenan lo mester presentá nan propio estilo i demostrá nan abilidat na e hurado. Nan lo tin e oportunidat pa presentá nan propio ‘set’ di muzik, pero lo mester por presentá tambe durante di un ‘Back 2 Back’, den esaki lo e mester por tuma i duna e presentashon di un otro dj. Finalmente e 2 finalistanan lo kompetí kontra di otro den un berdadero ‘Dj Battle’.

Un dje inisiadónan dje kompetensia aki ta Menasa, Bryan Palm, un dje dj mas eksitoso di Kòrsou na nivel internashonal. E lo ta e presidente di hurado ku lo konsistí di profeshonalnan den e ramo. ‘Mi ta hopi entusiasmá pa e bataya di dj, debí ku ta hóbennan ku nan tur por toka hopi bon’, asina Menasa ta indiká. ‘Aserka mi ta haña masha importante pa duna nan un empuhe ku nan karera dor di ta forma parti dje hurando i pa e oportunidat pa por duna nan tep’.

E hurado lo konsistí tambe di David Clementina di Rockorsou, dj Sento – dj i promotor di ‘Nachtwerk’ i Alain Voigt – dj i promotor di entre otro ‘Heftig’. E anochi lo keda presentá pa e konosido MC i animadó di radio, Chris Strick.

Awe nochi, lo tuma lugá e promé rònt di ‘Curaçao Dj Battle’ den Club Vanilla. Entrada pa e evento aki ta grátis. Por ta habri pa 7.30 di anochi i e kompetensia ta kuminsá pa 8’or di anochi. E di dos anochi, e anochi final lo tuma lugá otro siman, djabièrnè 19 di òktober. Ta pendiente pa e anunsio dje sitio kaminda e final lo tuma lugá.

‘The Flying Dutch’ ta tuma lugá dia 25 di òktober próksimo riba e lugá di parker di Mambo Blvd for di 6’or di atardi pa 1’or di mardugá. Karchinan ta optenibel via www.theflyingdutchcuracao.com i tambe na e puntonan di benta: van den Tweel Zeelandia, Mensing’s Caminada, Miles Jazz Cafe, Bruna, Bottles i Madero Lifestyle Store.