E di kuater edishon di e anual Curaçao North Sea Jazz Festival a keda selebrá den World Trade Center na Piscadera Baai ku dos konsierto grandi dianan 30 i 31 di ougùstùs 2013. E festival a atraé 4.331 bishitante internashonal, di kua 80% a bini Kòrsou pa e solo propósito ku tabata e festival. Kada bishitante internashonal a keda pa promedio 5.49 anochi, miéntras ku e grupo di bishitante ei pa promedio tabata konsistí di 2.23 persona. E loke turistanan a gasta tabata US$ 328.00 pa dia. E suma akí tabata 10 porshento mas ku loke e bishitantenan di e aña anterior a gasta (US$ 299.00) loke ta un oumento rekòrt di 171 porshento kompará ku e promé aña di e festival na 2010. E aporte total di e festival na ekonomia a bini eksklusivamente pa medio di e bishitantenan internashonal loke a monta na US$ 7.8 mion. E gastamentunan ekstremadamente haltu pa turista ta un prestashon sorprendente, espesialmente ora bo mira i tene na kuenta e Gran Reseshon i e inseguridat riba merkadonan mundial.  Un tim di investigadó di Dick Pope Sr. Institute for Tourism Studies di Rosen College of Hospitality Management na Universidat di Central Florida a realisá un estudio di e impakto ekonómiko i tambe a evaluá satisfakshon di bishitante relashoná ku e festival. E investigashon a mustra ku e festival tin un forsa atraktivo impreshonante riba e klientenan ku ta apresiá un produkto di kalidat ekstremadamente haltu i esei na su turno a oumentá na gastamentu poulatinamente durante e di kuater aña ku e festival ta den su produkshon. Bon mirá e turistanan a gasta mas plaka na hotèl  (32%), biahe (17%), hür di outo (12%), restorant (11%) i salimentu (9%). Un opservashon ku a keda ta ku 17% di e gastunan direkto di e turistanan a keda apsorbá dor di e festival (ku otro palabra e organisadó Fundashon Bon Intenshon). Esaki ta nifiká ku 83% di e gastunan direkto di e turistanan a bin resultá serka e suministradónan i esnan ku ta duna servisio na Kòrsou, ku kua e asina yamá  forsa di ‘spill-over’ (plamamentu) ta keda demostrá.

Amantenan fiel di muzik ta apresiá un produkto di kalidat ekstremadamente haltu

E festival ta atraé un kantidat kresiente di bishitante ku ta ripití, kompará ku e añanan anterior. Mas ku 40% di e bishitantenan di kua e motibu prinsipal di bini Kòrsou tabata pa bishitá e festival, anteriormente ya a yega di bishitá e festival. Tres luna promé ku e festival ya nan a buk nan hotèl, nan tambe tabata esnan ku tabata mas kontentu i satisfecho ku e festival i pa e motibu ei nan ta mas lihé inkliná pa bini bèk i rekomendá e festival na otronan. Nobenta porshento di e bishitantenan ku ta ripití, a bishita e festival tur dos anochi. Bishitantenan ku a ripití nan bishita na e festival (tur dos dia), ta keda 6.15 anochi riba e isla. E estadia di e grupo akí tabata mas largu ku e estadia promedio di tur bishitante internashonal. Bishitantenan ku ta ripití nan bishita ta keda pa promedio kuater dia mas largu pa bishitá i eksplorá e isla, gasta plaka i hasi uso di tur kos ku e isla tin di ofresé. Ta nan ta esnan ku ta kompartí nan eksperensianan positivo ku otronan i di e manera ei nan tambe a para bira un fuente importante di informashon tokante e festival.

Embolbimentu fuerte di amantenan di muzik

E bishitantenan internashonal ta informá ku nan tabata masha entusiasmá tokante e manera ku e festival ta hèndel ku diferente faktor ku ta aportá na nan eksperensia, manera un lokalidat atraktivo, entretenimentu i e elenko di artista. Nan entusiasmo pa e festival ta relashoná ku mas kos ku ta muzik mes i nan a indiká prinsipalmente ku pa nan mes nan tambe tabata gosa i disfrutá masha tantu di e festival. E faktornan akí a kultivá un grado haltu di satisfakshon i embolbimentu ku ta keda ekspresá den e hecho ku 92% di e bishitantenan internashonal a indiká ku nan a eksperensiá CNSJF komo e mihó konsierto ku nan a yega di bishitá, miéntras ku 90% a indiká ku nan lo bishitá e festival akí komo nan promé eskoho si nan lo bishitá un festival di muzik den futuro.

Embolbimentu i Apresio di Bishitantenan den relashon ku CNSJF

Henter e manera ku ta hinka e festival den otro ( organisashon, esfera, ambiente, medio ambiente, dekorashon, oferta di artista etc) mirá for di loke a keda manifestá i e preis rasonabel ku e bishitante ta paga, ta un prestashon úniko den mundu di festivalnan di muzik. Klaramente tin un interakshon entre e eksperensia di e bishitante i e loke e bishitante a paga. Ku otro palabra: e eksperensia di e públiko tin un impakto grandi riba e grado di gastu.

Peliger ta vislumbrá na horizonte

Sinembargo, lealtat na e festival lo por yega peligrosamente serka di e punto di saturashon di e festival. Bishitantenan internashonal (bishitantenan ku ta ripití nan bishita i bishitantenan ku ta bini pa di promé bes) di e festival por ehèmpel, a keda Kòrsou dos dia ménos, loke ta nifiká un pèrdida potenshal na entrada di mas ku 5 mion US$ pa ekonomia lokal.  E punto di saturashon lo por a keda kousá pa e poko sosten for di e sektor, gobièrnu i komunidat. E aporte konsiderabel relashoná ku e festival pa loke ta trata sektor turístiko, ekonomia lokal, e imágen di poblashon lokal i su kultura no a keda igualá dor di e entusiasmo i sosten popular pa un evento musikal asina grandioso. Lo por bai surgi un alehamentu peligroso entre e festival i e balor agregá di e produkto kaminda e posibilidat ta oumentá ku un deskomposishon entre e imágen di e festival, ku ta e produkto núkleo, i e produktonan ku ta duna un aporte di sosten (loke ta: sektor turístiko di Kòrsou i poblashon lokal) ku lo por influenshá e marka di e festival negativamente ku ta bolbe bai resultá den bahada di marka i nivel. Den kaso ku no logra bòltu e situashon akí, e mayor esfuersonan ku Fundashon Bon Intenshon, organisadó di CNSJF, a hasi na invershon pa drecha imágen di e isla i oumentá e oportunidatnan ekonómiko lo tabata e ora ei en vano.