WILLEMSTAD- OKT 2018: Djasabra último a tuma lugá e di dos edishon di ‘Banco di Caribe Play & Stay Tennis Tournament’ na CSC, Damacor i e tabata un éksito rotundo. E aña aki mas ku 50 mucha a partisipá na e torneo di tènis, repartí den 3 kategoria; ‘red ball’ pa mucha entre 6 i 8 aña di edat, ‘orange ball’ pa mucha entre 8 i 10 aña di edat i ‘green ball’ pa mucha di 9 i 10 aña di edat.

E resultadonan:

Banco di Caribe ta felisitá mayor i yu ku e resultadonan, ya ku ta mashá importante pa e mayornan kompañá nan yu durante di e torneo. Por a nota entusiasmo tantu riba kancha i den públiko. Maske ku tur mucha ta un ganadó, ta hasi menshon di esnan ku a sobresalí den e torneo; Zhenu Windster a bira kampion den kategoria red balls, Diya Raghani den orange balls/girls, Jevahn Josephia den orange balls/boys, Zena Wagner den green balls/girls i finalmente Kayden Domacasse den green balls/boys. E sup-kampionnan den e Banco di Caribe Play & Stay Tennis Tournament’ a resultá Amara Zimmerman (kategoria red balls), Zoeh Nicatia (kategoria orange balls/ girls), Leonardo Winkel (kategoria orange balls/boys), Nahla de Lanooi (kategoria green balls/girls) i tambe Kennard Gallardo (kategoria green balls/boys).

‘Banco di Caribe Play & Stay’ ta sirbi komo introdukshon na kompetensia di tènis. Torneonan manera esaki ta stimulá e muchanan pa sigui desaroyá den e deporte, pa keda aktivo i desaroyá nan téknika di wega. Banco di Caribe ta mashá kontentu ku otro eksitoso edishon di ‘Banco di Caribe Play & Stay’ i ta gradisí sr. Francis Hoyer di Curaçao Tennis Foundation, tur boluntario i tambe e mayornan ku a akudí na kancha pa apoyá e muchanan.