30 di novèmber den WTC

WILLEMSTAD.- Djabièrnè 30 di novèmber tei bira un anochi kaminda solamente éksitonan di tres di e kompositornan Dwight Leoneta, Quincy Comenencia i Darrel ‘Titi’ de Palm tei zona den WTC.

Un total di 11 kantante lo interpretá kansionnan ku a keda komponé pa e trio di kompositornan kompaña pa un orkesta bou di direkshon di Gino Genaro.

Dwight Leoneta a konta ayera nochi durante dje rueda di prensa ku e konsepto aki tin algun aña para ta warda e momentu perfekto pa realisá esaki. ‘Ta for di basta un par di aña atras ‘Titi’ ta kana ku e idea aki i awor ta e momentu oportuno pa nos realisá e tremendo ‘King of Hits’ aki’, asina Dwight a indiká.

‘ARMY OF 14’

Un orkesta ku ta konsistí di amigu músikonan ku a yega di forma parti di Q-Sign i Cache Deluxe a keda forma i a haña e nòmber ‘Army of 14’, debí ku ta 14 músiko ta forma e orkesta, asina Gino Genaro a informá. E orkesta lo kuminsá otro siman ku ensayo pa dje forma ei ensayá e repertorio ku te ainda ta konsistí di 30 komposishon. Ku tur probabilidat lo uni mas músiko na e orkesta i nan lo presentá na okashon, den kaso di kansionnan spesial ku lo keda presentá.

STAGE

Quincy Comenencia a ekspresá ku lo tin un stage ku nunka promé a keda harma aki na Kòrsou. E stage lo tin 3 pasarela ku lo ta basta largu, loke lo pone ku e bailadó lo bai baila den áreanan kaminda lo e por disfrutá tambe dje presentashon dje kantante serka banda di dje. Mas aleu Quincy a indiká di ta sumamente kontentu ku e oportunidat ku a presentá pa rebibá e éksitonan ku ela komponé kuminsando for di su promé piesa ku tabata pa Rajiv Landaeta i ku lo keda interpretá pa Clark ‘Yuyu’ Zalm dia 30 di novèmber próksimo.

DEDIKASHON

‘King of Hits’ lo bai keda dediká na dos músiko ku tabatin un influensia riba e desaroyo di e género ‘Ritmo Kombiná’ i ku tabata ‘role model’ pa hopi dje músikonan ku lo ta presentando durante dje fiesta. E trio di kompositornan a skohe pa dediká e tremendo fiesta aki na Ryan i Randall Rog, músikonan ku for di inisio di nan karera musikal den Explosivos, Gio i despues Tune a sa di hasi e diferensia pa loke ta kompañamentu musikal i desaroyo di Ritmo Kombiná.

DONASHON

Dwight, Quincy i Titi a tuma e desishon ku un parti dje fondonan ku keda rekoudá durante dje fiesta ‘Kings of Hits’ lo hasi un donashon kuné na Instituto pa Formashon Musikal, pa dje forma ei duna nan kontribushon na e formashon musikal lokal.

Sr. Manfred ‘Feco’ Gomes, direktor di Instituto pa Formashon Musikal tabata masha kontentu ku e desishon di e trio di kompositornan. Feco a indiká ku ounke e instituto ta pasando den momentunan difísil pa loke ta fondo pa duna lès, e ta kontentu ku e trio di músiko a tuma e desishon pa duna un aporte na e instituto.

KARCHI

Entrante mañan karchinan lo ta optenibel na Mensing’s Caminada, Tik Tak i Beep Beep Rio. Karchinan pa sekshon di VIP ta optenibel yamando Anaiz na 513-2841.