Kos bon ta sigui pasa pa Kòrsou.

Willemstad – Sèptèmber 2018.. Dos banko lokal ku konfiansa den Kòrsou ta finansiá Aqualectra pa un suma di 325 mion florin. Un parti ta pa refinansiá Aqualectra i otro parti ta pa finansiá invershonnan nobo di Aqualectra.

Maduro & Curiel’s Bank i CIBC FirstCaribbean ta kere ku si nos tur traha huntu i pone konfiansa den nos dushi Kòrsou i su ekonomia, kos lo mehorá i nos tur lo disfrutá di esaki.

Ta den nos tur su man pa pensa i aktua positivo i hasi di nos parti pa yuda Kòrsou floresé.

Di e manera aki, nos sektor privá tambe ta mustra di tin konfiansa den Kòrsou i ta aloká un montante kuantioso pa futuro di nos pais. Ta di remarká ku parti di e finansiamentu lo wòrdu repartí bou di otro instansianan lokal ku tambe tin pleno konfiansa den un futuro Positivo pa Kòrsou. Partidonan ta premirá ku pa medio novèmber e kontrato lo mester ta firmá.

Maduro & Curiel’s Bank, CIBC FirstCaribbean, Aqualectra i e partnernan den e finansiamentu aki ta sigui invertí den nos ekonomia lokal pa desaroyonan positivo di nos Dushi Kòrsou.