E kadena di supermerkado mas grandi na mundu despues di Wal-Mart
WILLEMSTAD – Awe nochi durante un enkuentro bon bishitá den sentro di kompra Sambil den presensia di invitadonan, entre nan minister, relashonnan di trabou i representantenan di prensa, a hasi e anunsio ofisial ku dentro di poko e kadena Franses di supermerkado Carrefour ta establesé aki. Tras di e muraya kaminda esaki a tuma lugá lo bini entre awor i inisio di 2019 un supermerkado moderno ku ta kumpli ku e prinsipionan mas haltu di operashonnan konsiente di e klima i inovativo, ku no tin igual na Kòrsou.
Sambil a bisa promé ku nan apertura na fin di mei 2015 ku na promé instansia ta okupá dos-terser parti di e kompleho. E konstrukshon rudimentario di e parti patras tabata kla, pero esei nan lo akabá na momento ku un kliente renombrá mustra interes pa establesé eiden. E momento ei a yega awor. Ta traha tur-ku-tin awor pa kaba di drecha e parti mas pabou di e kompleho aki promé ku fin di aña pa por akomodá Carrefour. Akshonista Alfredo Cohen i direktor Jonathan Cohen a yama Carrefour bonbiní.
Marka
François Huyghues Despointes, Presidente di Hunta di Direktiva di Carrefour Caribbean Safo Group, den su introdukshon a splika ku na 1959 a funda e kadena di supermerkado Carrefour i ku e ta manehá mas ku 12.000 tienda i site di e-commerce na 10 pais integrá i na mas ku 20 pais ku partner, repartí na Europa, Asia i Latino-Amérika. Den Karibe nan ta na Guadeloupe, Martinique, Guyana Franses, Repúblika Dominikana, Saint Martin – i awor tambe na Kòrsou. Boneiru i Aruba lo por sigui tambe. Carrefour tin mas ku 400.000 hende empleá ku pa dia ta sirbi 90 mion kliente, kaminda ta boga pa kalidat, komèrsio duradero i kresementu ekonómiko. E marka Carrefour ta enserá pakus chikitu manera Carrefour Express i Proxi, supermerkado manera Carrefour Market, Carrefour City, Carrefour Bio i Carrefour Contact i hyper merkado manera Promocash, Atacadao i Supeco.
Konsiente di medioambiente
Sunil Khatnani, ko-akshonista di Carrefour Curaçao & St. Maarten, a deklará ku nan a bini Kòrsou pasobra nan ta kere den e merkado Kurasoleño i den e potensial di e isla aki. Esaki ta un promé paso, pero tin mas establesimentu den tapara na Kòrsou, ku un surtido amplio di produkto nobo, fresku na bon preis, manera e konsumidónan na St. Maarten ya por a eksperensiá.
El a splika ademas ku loke Carrefour ta distinguí su mes aden ta ku e ta operá di forma inovativo i konsiento di medioambiente. Por ehèmpel, nan ta usa èrko ku ta usa tiki energia i sistemanan di refrigashon ku emishon abou di Co2, rèkinan ku etiketanan digitalisá, aplikashon di teknologia nobo, un enfoke moderno, etc. Ademas, mas tantu posibel Carrefour ta tuma produkto di suministradónan lokal. Pa esei e siman aki ya nan tabata kombersando intensivamente ku distribuidor i produktornan lokal, inkluso ku agrikultornan. E kombersashonnan aki lo sigui den e periodo binidero.
Empleo
E representante lokal di Carrefour, Aubrey Regina, a splika ku Carrefour ta di Fransia, e pais ku ta konosí pa su kushina ekselente i e kuna di platonan ekskisito. Na Kòrsou Carrefour ta lanta un supermerkado lokal, den un bachi internashonal. E produktonan ta di kalidat Europeo, na preisnan lokal. Kalidat no tin nodi di ta karu. E konsumidónan lo ripará ku e ta un supermerkado nobo ku un konsepto diferente na loke nan ta kustumbrá kuné. No ta pòrnada Carrefour, despues di Wal-Mart, ta e kadena di supermerkado mas grandi na mundu.
Reklutashon
Grupo Carrefour ta duna prioridat na reklutá hende lokal i pa entrená gerente i personal na e sitio mes. Den ehekushon di tur e tareanan e tres balornan primordial di e kompania ta: committed, caring & positive. Despues di e apertura eksitoso di algun establesimentu na St. Maarten ta sigui Kòrsou awor. Pa hasi esaki un éksito aki tambe, ta buskando un tim di manager entusiasmá i profeshonal ku ke tuma e reto riba nan. Na promé instansia Carrefour ta en buska di 80 empleado lokal kalifiká ku lo haña nan entrenamentu konforme e forma moderno di hiba negoshi di e kadena aki. E reklutashon ta kore atraves di e ofisina lokal Balance Recruitment. Despues ta sigui e entrenamentu promé ku e fecha di apertura mes ku lo anunsiá na komunidat asina ku esei ta kla i determiná.