WILLEMSTAD- SEPT 2018: Riba djamars 18 di sèptèmber último, JCI IOBA Curaçao huntu ku partners nan, Banco Di Caribe, CINEX i University of Curaçao (UoC) tabata tin un seminario tokante di ‘Digital Nomad’. Durante di e seminario a splika e idea tras di e proyekto aki, kiko ta un ‘Digital Nomad’, kiko e Oportunidat nan ta pa kresementu ekonómiko pa Kòrsou i kon pa hasi Kòrsou un destinashon atraktivo i posiblemente definitivo pa e ‘Digital Nomads’ nan rònt mundu.

Despues di a disfrutá di e dokumentario ‘One Way Ticket, the rise of the Digital Nomad’, e orador nan invitá Olga Job (Digital Nomad), Carina Piggott (Digital Nomad) i Minister Steven Martina a duna un tremendo presentashon kaminda nan a elaborá mas amplio riba e tópiko interesante aki i alabes trese diferente perspektiva i posibilidat nan di dilanti di kon lo por hasi nos dushi Kòrsou un pais mas atraktivo pa e forma di turismo nobo aki.

Despues di e presentashon di e orador nan tabata tin un pènel di diskushon ku Promé minister, sr. Eugene Rhuggenaath, Minister di Desaroyo Ekonómiko, sr. Steven Martina, representante di UoC, sr. Guido Rojer jr., Carina Piggot komo un ‘Digital Nomad’, Nevita Mezas di The Business Connection i tambe Ramon Koffijberg di CINEX. Durante di e pènel e oudiensia por a hasi pregunta na e pènelistanan i na final tabatin oportunidat pa un seshon di ‘networking’ riba patio na UoC.

JCI IOBA kier a yama un danki na tur su partner nan ku a kere den e projekto ku ta Banco Di Caribe, CINEX, UOC, CHATA i BLEND.