Inskribí bo yu pa tènis

WILLEMSTAD- SEPT 2018: Pa di dos aña konsekutivo Banco di Caribe ta kolaborá ku Curaçao Tennis Foundation pa organisá ‘Banco di Caribe Play & Stay Tennis Tournament’. E torneo di tènis pa mucha di entre 6 i 10 aña di edat a resultá un gran éksito aña pasá. E aña aki lo tene e torneo riba djabièrnè 28 i djasabra 29 di sèptèmber na Curaçao Sports Club (CSC) na Damacor.  

Registrá bo yu:

Banco di Caribe su sosten na proyektonan deportivo den kua formashon di mucha i hóben ta sentral no ta nada nobo. Semper ta purba na motivá e mucha òf hóben pa praktiká deporte ya ku esaki tin hopi benefisio pa su formashon komo hende i despues komo un profeshonal tambe. For di chikitu mester krea e lidernan di futuro i deporte ta un bon vehíkulo pa esaki. Ademas, dor di adoptá e deporte ta yuda promov’é tambe i ta spera ku torneonan manera e ‘Banco di Caribe Play & Stay Tennis Tournament’ ta mantené e interes serka e mucha- i hóbennan pa e deporte. Banco di Caribe ta invitá tur mayor pa registrá nan yunan di entre 6 i 10 aña di edat riba djabièrnè 21 di sèptèmber próksimo entre 5:30PM i 7PM na CSC. Kontribushon pa e registrashon lo ta únikamente 15 florin.

Tres kategoria di partisipashon:

E torneo di tènis lo keda dividí den 3 kategoria; ‘red ball’ pa mucha entre 6 i 8 aña di edat, ‘orange ball’ pa mucha entre 8 i 10 aña di edat i finalmente ‘green ball’ pa mucha di 9 i 10 aña di edat. E intenshon tras di e ‘Banco di Caribe Play & Stay’ ta pa introdusí e muchanan na kompetensia di tènis. Torneonan manera esaki ta sirbi pa stimulá e mucha pa keda i sigui desaroyá den e deporte.

Ta invitá tur mayor, amigu i fanátiko di tènis pa yega kancha di CSC i apoyá e muchanan durante e torneo. Apoyo di un mayor den un torneo manera esaki ta di sumo importansia. Pa mas informashon di e torneo por tuma kontakto ku sr. Francis Hoyer na number di telefon 510-2645 òf bishitá www.sport.cw .