WILLEMSTAD/ Despues di su track promoshonal “Llamame”, Bauco ta orguyoso di por feature ku otro kantante ku ta dominando e género musikal latino, Enmeris. E track nobo “La favorita en mi cama” di Enmeris ku presentashon di Bauco ta loke nan ta yama internashonalmente un ‘club banger’ i ei mes ta duna un vibrashon eksótiko konsiderando e letranan i moveshonnan sensual den e videoclip. Pa Bauco esaki ta otro oportunidat di presentá su mes na su públiko lokal pero tambe ta un otro pouta pa merkado di Latinoamérika.

Enmeris ta disfrutando di un temporada masha eksitoso i ounke lokalmente bo no ta skucha di dje, den merkado di Latinoamérika Enmeris ta gosa di un popularidat kresiente. Su kolaborashon ku Mely Mel ta un hit total produsiendo 5.4 mion views den 7 luna di tempu. Di akuerdo ku e kas di produkshon Decoded, enfoke di Enmeris ta keda riba merkado internashonal i ta pendiente pa algun kolaborashon masha eksitante próksimamente. Pa Enmeris, e feature ku Bauco ta nifiká aportá na e género musikal i kresementu di e artista. Enmeris ta di opinion ku Bauco tin hopi talento i potensial.

“La favorita en mi cama” ta un ‘denbow’ produsí pa e produktor arubano YoungTwista. E featuring di Bauco riba un track di Enmeris ta un di e hopi proyektonan ku tin na kaminda pa e kantante di 19 aña di edat. Den luna di novèmber próksimo Bauco lo ta ‘opening act’ pa e kantante Lirico En La Casa ku tin un base di fanátiko di kasi 500,000 siguidó riba YouTube só. E piesa nobo ya tin 13,000 views den 3 dia i ta optenibel riba plataformanan internashonal manera iTune, Spotify, Tidal i Apple Music. Fanátikonan por sigui Bauco riba su Instagram/ Facebook/ SnapChat bauco.cr i Enmeris tambe riba su profil ofisial. Tur artista di Decoded por wòrdu siguí riba e Youtube Channel, Facebook, Instagram i SnapChat @decodedofficial.