Direktor Justus van der Lubbe di Inter-Assure

WILLEMSTAD – Awe Inter-Assure Insurance a kompletá un kuart siglo ku konstantemente resultadonan positivo pa e negoshi. Sinembargo, loke ta fria e alegria pa e logro aki ta e prekupashon hustifiká pa loke ta spera e komunidat di Kòrsou den e añanan binidero si no ta bini un kambio ekonómiko. No únikamente e desaroyonan den e ramo di seguro, pero tambe e prospektonan general pa ekonomia di Kòrsou ta duna motibu di gran prekupashon. Den bista di direktor Justus van der Lubbe, Inter-Assure por enfrentá e siguiente 25 añanan ku konfiansa si e sektornan públiko i privá rekonosé sufisientemente ku nan huntu mester pone nan skouru bou di ekonomia.

Señor Van der Lubbe sigur no ke krea un impreshon melankóliko hustamente awor ku su negoshi a alkansá su di 25 aniversario, loke lo selebrá na un forma apropiá ku e personal. Na mes momento ta difísil pa e sera su wowo pa e realidat sosioekonómiko i polítiko. Instansianan outorisá ta blo mustra e komunidat den ki mal estado ekonomia ta – no ta kos di kanta makamba. Na múltiple okashon señor Van der Lubbe no a basilá pa opiná riba kestionnan, por ehèmpel ku uso di alkohòl den tráfiko ta kosta e ramo tur aña sumanan supstansial na daño material, pa no papia mes di e sufrimentu humano. Porfin tin sierto perspektiva awor ku resientemente a kuminsá kontrolá di moda mas frekuente i severo riba alkohòl den tráfiko.

Invershonistanan

Basá riba su 25 aña di eksperensia, Inter-Assure mes lo por duna un disertashon riba e forma ku gobièrnu den hopi kaso ta mas un estorbo ku e ta un aliado pa yuda empresanan bai dilanti. Pero e konstatashon aki ta haña mas profundidat den e interakshon regular ku su propio klientenan, tantu esnan partikular komo e komersiantenan. For di esaki ta resaltá kada be atrobe ku e aparato gubernamental ta lento, poko konsistente i hopi be ta stroba kualke forma di desaroyo nobo. Kehonan repititivo ta e red-tape, leinan antikuá, wantamentu di adaptashonnan hustifiká di tarifa, gastunan sosial haltu, gastunan haltu pa hiba negoshi, inkluso di elektrisidat i awa, belasting haltu, etc. E mesun imágen ta bini dilanti for di e resultadonan di enkuestanan di e Ofisina di Estadístika mustrando ku e empresarionan no ta mira masha perspektiva. Bou di sirkunstansia asina di mes ta surgi e pregunta kon gobièrnu ta kere ku por motivá invershonistanan pa hinka nan kapital, pa kua nan a traha duru pa logra, den proyektonan lokal.

Apelashon dramátiko

Den e kuadro aki ta algu pekuliar pa gobièrnu, pa motibu di un ekonomia ku ta sigui kremp, resientemente a hasi un apelashon dramátiko riba sektor partikular pa invertí i asina yuda lanta ekonomia for di suela. “Si gobièrnu no duna kontenido na su papel di fasilitadó, nunka e progreso no por tuma lugá. Henter sektor públiko mester realisá ku e tempu a pasa pa mira sektor partikular komo e baka ku ta duna lechi. Sektor privá realmente ta e motor pa kualke forma di desaroyo ekonómiko i ta numa si e haña espasio atrobe, ekonomia por bon funshoná dinobo i esei lo tin un efekto favorabel riba e presupuestonan di gobièrnu. Ta ora traha huntu so por pone un fundeshi pa un situashon di win-win pa Kòrsou”, segun señor Van der Lubbe.