Dia 18 di sèptèmber na Universidat di Kòrsou

WILLEMSTAD- OUG 2018: E laso di koperashon entre Banco di Caribe i JCI IOBA no ta di awor aki; den transkurso di añanan Banco di Caribe a sostené diferente proyekto. Den luna di sèptèmber próksimo JCI IOBA lo presentá un evento titulá ‘Digital Nomads’, e anochi di deskubrimentu aki lo ta ekipá ku diferente oradó lokal i internashonal, diskushon di un pènel profeshonal i lo finalisá ku un oportunidat di networking. Banco di Caribe ta orguyoso di duna su aporte na un tópiko asina aktual i ku sin ku nos mes ta konsiente di dje, ta tumando lugá na Kòrsou.

JCI IOBA ta un organisashon non-profit ku ta afiliá na Junior Chamber International (JCI), e organisashon mas grandi na mundu ku ta dediká su mes na e.o formashon di lidernan nobo di entre 18 i 40 aña di edat. Ademas, e organisashon tin komo mishon pa empoderá hóbennan pa krea kambionan positivo den nos komunidat i Banco di Caribe ta sostené esaki.

Kiko ta un Digital Nomad?

Un ‘Digital Nomad’ ta un persona ku ta usa primordialmente konekshon di internèt pa gana su pan di kada dia, i por lo general ta kondusí su bida ku un aktitut nomádiko. Esaki ta por ehèmpel si bo tin Kòrsou komo residensia, pero ta biaha rònt mundu pa ehersé bo trabou i no tin un ofisina fiho. Den e kaso aki ta usa cafe’s, restorant, stashon di trein, biblioteka, un ofisina flex i- te hasta un playa, manera aki na Kòrsou. E aktitut empresarial aki, un poko in-usual pero masha lukrativo, ta na moda i a wòrdu adoptá den Caribe kaba. Awendia ku un laptop, smartphone òf kualke unidat ku por hasi un konekshon ku WiFi- ta ponebo ‘in business’. Un kos sí, bo mester sá kon pa hasié.

Oportunidat di kresementu ekonómiko pa Kòrsou:

E estilo di hasi negoshi aki ta tumando lugá na Kòrsou, i te hasta por bisa ku nos isla ta un ‘Caribbean Spot’ pa hopi ‘Digital Nomads’ ku ta biaha konstantemente. Por ehèmpel, ta skohe Kòrsou pa su klima tropikal, ora ku na e pais di residensia ta temporada di wenter. Turístikamente esaki ta na nos benefisio. Na mundu tin miónes di ‘Digital Nomads’ i estudionan resien ta indiká ku pa aña 2035 lo tin aproksimadamente 1 bion di nan. Kòrsou mester ta prepará pa esaki i e evento di JCI IOBA lo duna un introdukshon na esei. Lo kompartí eksperensia real di un Yu di Kòrsou ku a adoptá e bida di un ‘Digital Nomad’ eksitosamente.

Banco di Caribe komo patrosinadó di e evento aki ta invitá tur ku ta sinti nan mes atraé na e tema moderno aki pa bishitá e evento dia 18 di sèptèmber for di 18:30 pa 22:00 na ouditorio di Universidat di Kòrsou. Pa mas informashon por bishitá e página di facebook https://www.facebook.com/jciioba/ .