Algun luna pasá maneho di agrupashon Gentz Tre’chic a wòrdu pone na altura dor di dos di su miembronan ku nan a risibí un oferta sumamente lukrativo pa pasa pa forma parti di un otro agrupashon musikal. Siendo un agrupashon musikal profeshonal i dinámiko, maneho di Gentz Tre’chic a komprondé esaki i palabrá un deadline ku e dos miembronan akí pa kaba di ehekutá e presentashonnan ku tabatin planiá.

Durante e periodo akí maneho a kuminsá sondia merkado pa inkorporá un òf mas kantante nobo den agrupashon Gentz i a dileberá diferente senario pa kontinuashon di e agrupashon. Mirando ku Gentz tin diferente presentashon palabrá tantu na Kòrsou komo den eksterior pa kual Gentz ta risibiendo hopi akohida mester a buska miembro nobo pa sigui ehekutá e vishon i palabrashonnan ku Gentz tin riba mesa.

Maneho di Gentz a sondia durante algun luna i a wòrdu aserká tambe dor di diferente kantante pa kual nos ta apresiá esaki. Finalmente despues di e regreso for di e tour ku Gentz tabatin na Hulanda i Bélgika eksitosamente, a tuma e desishon final pa inkorporá ofishal Henry-Anthony Bernadina mihó konosí komo Henry-B komo un dje kantantenan den agrupashon musikal Gentz.

Pues di e forma akí maneho i músikonan di Gentz ta yama Henry bon biní den e famia musikal, i pa e wikènt binidero por kuminsa disfrutá di Henry den frònt di Gentz den e fiesta titulá ‘Savage by Tsean & Randy’ aya na club Spoonz. Ademas un i tur keda pendiente pa otro siman e kansion nobo di Henry-B huntu ku Gentz titulá ‘Laga nan Papia’ lo ta riba merkado i na tur radio emisora.