Riba 4 di yanüari 2014 “Fundashon Alton Paas” ta organisá un interesante  maratòn di fitness, kaminda lo desafiá e públiko partisipante pa praktiká diferente aktividat di moveshon durante 2 seshon di 6 ora kada un. Di 6’or di mainta pa 12 ‘or di mèrdia tin e promé seshon ku a keda denominá komo “Heavy Sweat”. Durante 8 seshon di 45 minüt lo enkurashá e partisipantenan pa surpasá nan límite i praktiká entre otro Zumba, Boogie Box Fitness, Pilates, Totalfitt, Outdoor Workout, Crossfit, Essentrics i un Boothcamp. E seshon aki lo ta bou di guia i direkshon di entre otro Charlyne Balentina, Sabina Evertsz, Helen Griffith-O’brien, Daniel Yung, Ashley Rijnita/Dionne Simmons, Hayrich Juliana, Eva Henriquez i Uriel Trusfull, ku animashon di DJ Quiltje i DJ Jack. Despues di 6’or di atardi pa 12’or di anochi lo tin e seshon “Light Sweat”, kaminda e partisipantenan bou di muzik bibu di entre otro RHYDMM, Trinchera i tambe muzik di DJ RO1, DJ Jorgel i mas, lo praktiká diferente moveshon di kurpa pa asina mantené nan mes den forma. Partisipantenan tin posibilidat pa paga pa un seshon òf tur dos. E gran evento aki ta tuma lugá den International School of Curacao. Meta di “Ban Move Kurpa ku Fundashon Alton Paas” ta primeramente pa uni komunidat masalmente den un aktividat di moveshon. Asina komunidat por habri aña ku un Bon Intenshon pa un Bida Saludabel. Na di dos lugá e aktividat aki ta pa yuda rekoudá fondo pa kubri gastunan di proyektonan di Fundashon Alton Paas, e.o. proyekto piloto di terapia intensivo aki na Korsou ku 6 persona ku Dwarslesie, kompra di ekipo speshal pa e terapianan, grupo di sosten pa personanan ku Dwarslesie i nan famia, konferensia ku oradornan internashonal i mas. Manera ta konosí den luna di yüni 2013 a start e promé proyekto kaminda tres hóben ku Dwarslesie, Jurvin Lourens, Steven Cristina i Alton Paas a biaha pa Carlsbad California (Merka) pa risibí terapia a base di ehersisio intensivo pa mehorá nan salu i drecha nan kalidat di bida. Nan a regresa i apesar ku nan estadia tabata di 3 luna so, e rekuperashon di e hóbennan ta bistoso. Pa por kontinuá ku programanan di rekuperashon aki na Korsou ta rekerí sierto invershonnan. Esaki ta inkluí entre otro fisioterapia ku e terapista ku tambe a bai Project Walk Carlsbad (Merka) i ekiponan speshal. Via di e evento “Ban Move Ku Fundashon Alton Paas” e fundashon ke purba di rekoudá algun fondo pa por yuda kubri e invershonnan rekerí. Mester bisa aserka e invershon ta algu duradero, ya komo ku e ekipo ta yuda otro klientenan di Dwarslesie den nan rekuperashon tambe. “Fundashon Alton Paas”  a keda fundá riba 7 sèptèmber 2012 ku e meta pa konsientisá personanan ku Dwarslesie (SCI – Spinal Cord Injury) riba nan desabilidat, siña formanan pa nan tin un mihó kalidat di bida i tambe pa konsientisá nan sernan kerí, famia, amistat i komunidat en general kon pa ta mas konsiente i kon pa duna asistensia na e personanan aki pa asina stimulá un mehorashon den nan kalidat di bida.  “Fundashon Alton Paas” ta konvensí ku aktividatnan di moveshon di kurpa i hasi ehersisio ta e mihó forma pa yuda desaroyá i mantené un kurpa salú, inkluso serka personanan desabilitá. Pa esei Fundashon Alton Paas ke enkurasha tur personan ku Dwarslesie pa partisipá durante e seshon di ‘light-sweat’. Pa hasi esaki nan mester registrá serka Fundashon Alton Paas i nan  lo haña nan entrada gratis. Durante seshon di ‘light-sweat’ nos fisioterapista Brigitte Schroevers lo tei pa duna e moveshonnan speshal pa nan. Nos tur, tur hende mester siña invertí den nan propio salú pa alkansá un mihó kalidat di bida. Esaki ta konta tambe pa personanan desabilitá. Moveshon i ehersisio no solamente ta yuda den e proseso pa aselerá e tempu di rekuperashon, pero e ta mantené tambe e kurpa saludabel. Via di e aktividatnan di rekoudá fondo “Fundashon Alton Paas” ta purba di animá i konsientisá komunidat pa ta mas aktivo, alabes pa kontribuí ku e fundashon di moda ku nan tambe por yuda otro personanan ku Dwarslesie, pa nan tambe por alsa nan kalidat di bida. Pa mas informashon tokante e proyekto “The Breakthrough Fitness Challenge” òf pa mas informashon tokante “Fundashon Alton Paas” por e-mail na info@fundashonaltonpaas.org òf yama telefòn 736-3577, 5100767 òf 512-5902.