Donashon di 24,000 florin na Fundashon di Special Olympics

WILLEMSTAD: Digicel a renobá su kompromiso ku Fundashon di Special Olympics Curaçao pa e temporada nobo, 2018-2019. E aporte na atletanan di Special Olympics ta kontinuo no únikamente na Kòrsou sino den kasi tur merkado na unda Digicel ta operá. Atletanan di Special Olympics semper a forma parti di aktividat, kampaña- i trabounan komunitario di Digicel. Ademas, e partisipashon di Digicel ta bai muchu mas leu ku un sosten finansiero. Asina por menshoná ku pronto lo bai repartí algun foyeto informativo tokante di e fundashon i su atletanan, di e forma ei Digicel lo yuda konsientisá nos komunidat riba mishon i vishon di e fundashon.

Den luna di novèmber próksimo lo tin 2 evento importante pa e fundashon; ta tuma lugá e weganan lokal di Special Olympics Curaçao i tambe e ‘Movie Night’ ku lo ta un rekoudashon di fondo pa e atletanan. E nochi di sine lo tuma lugá den un sala di sine popular riba nos isla. Próksimamente lo duna mas informashon; Digicel lo sostené Fundashon Special Olympics Curaçao den esaki tambe i ta invitá nos komunidat for di awòki pa keda pendiente pa e fecha di e ‘Movie Night’ i pa kumpra nan karchi den forma di un sosten na e fundashon.