WILLEMSTAD/ Ya kaba por a tende di dje, e’la práktikamente ‘krese’ den bista di Kòrsou. For di su niñes pa su hubentut Xechell Jacobs a bin ta konta ku kariño di Kòrsou. Awe, ku e ta hasi un paso grandi den su karera, ta mas ku klaro ku Kòrsou mester haña sá promé! For di awe, e yònkuman di Mundo Nobo, Rei di tumba Hubenil ta adoptá un nòmber di artista nobo ku kual e lo bai konkistá Latinoamérika. “Bauco” ta un eskoho propio di Xechell. E nòmber ta identifiká su ‘flow’, aspirashonnan pa futuro i su determinashon pa alkansá éksito. E talentoso kompositor, areglista i kantante yu di Kòrsou ta klá pa inisiá su karera internashonal i Decoded ta preparando e introdukshon di Bauco den gran forma!

Representante di Decoded ta indiká ku Bauco lo ta un otro ‘kara’ di Xechell i no mester konfundí e hóben èks Rei di Tumba ku su personahe artístiko nobo. “Bauco a bin ta demostrá madures komo kompositor i areglista, i nos di Decoded ta prepará pa lans’é riba tur plataforma den Latinoamérika. Nos ta mira su potensial i ta sigur ku e por tin un impakto den mundu di farándula lokal, latino i despues ku un posibel cross-over”. Awe e piesa nobo di Bauco ta kuminsa zona. “Llámame” ta un reggaetón produsí pa Pastor i lo por wòrdu skuchá na tur radio-emisora lokal i riba plataformanan internashonal manera iTune, Spotify, Tidal i Apple Music. Ademas, ta lansa un otro single, titulá “Te Mentí”, un trap ku tambe a keda produsí pa Pastor. Fanátikonan por sigui Bauco riba su Instagram bauc.cr Tur artista di Decoded por wòrdu siguí riba e Youtube Channel, Facebook, Instagram i SnapChat @decodedofficial.